ຮຽນ: ສະຫາຍບຸນ​ຍັງວໍລະ​ຈິດ, ​ເລຂາທິການ​ໃຫຍ່ຄະນະ​ບໍລິຫານ​ງານ​ສູນ​ກາງພັກປະຊາຊົນ​ປະຕິວັດ​ລາວ, ປະທານ​ປະ​ເທດ ​ແຫ່ງ​ ສປປລາວທີ່​ນັບຖື ​ແລະຮັກ​ແພງ.

     ຂ້າພະ​ເຈົ້າ​ຮູ້ສຶກ​ດີ​​ໃຈ​ທີ່​ໄດ້​ຮັບ​ຈົດໝາຍ​ທີ່​ເຕັມ​ໄປ​ດ້ວຍ​ນໍ້າ​ໃຈ​ມິດຕະພາບ​ອັນ​ອົບ​ອຸ່ນ ​ແລະສະໜິດສະໜົມ​ຂອງສະຫາຍ​ເລ​ຂາ​ທິການ​ໃຫຍ່ບຸ​ນຍັງວໍລະ​ຈິດ ​ໃນ​ບໍ່​ດົນ​ທີ່​ຜ່ານ​ມາ. ຂ້າພະ​ເຈົ້າມີ​ຄວາມ​ປິ​ຕິ​ຊົມ​ຊື່ນ​ທີ່​ເຫັນ​ວ່າການ​ສະໜັບສະໜູນ​ຊ່ວຍ​ເຫຼືອ​ຂອງ​ຝ່າຍ​ຈີນ​ ​ໄດ້​ປະ​ກອບສ່ວນຢ່າງ​ຕັ້ງໜ້າ​ ໃຫ້​ແກ່​ການ​ສະກັດ​ກັ້ນ, ປ້ອງ​ກັນ ​ແລະຄວບ​ຄຸມ​ການ​ລະ​ບາດ​ຂອງ​ພະຍາດ​ໂຄ​ວິດ-19 ຢູ່ສປປລາວ. ນະ​ທີ່​ນີ້, ຂ້າພະ​ເຈົ້າຕາງໜ້າ​ໃຫ້ພັກ​ກອມ​ມູນິດ​ຈີນ, ລັດຖະບານ​ຈີນ ​ແລະ ປະຊາຊົນ​ຈີນສະ​ແດງ​ຄວາມ​ຊົມ​ເຊີຍ​ຢ່າງ​ຈິງ​ໃຈຕໍ່​ຝ່າຍ​ລາວພາຍ​ໃຕ້​ການ​ນໍາພາຂອງພັກ​ປະຊາຊົນ​ປະຕິວັດ​ລາວທີ່​ມີສະຫາຍ​ເລຂາທິການ​ໃຫຍ່ບຸນ​ຍັງວໍລະ​ຈິດ ​ເປັນ​ແກນ​ນໍາ​ ທີ່​ຍາດ​ໄດ້ຜົນ​ສຳ​ເລັດ​ໃນ​ວຽກງານ​ການ​ສະກັດ​ກັ້ນ, ການ​ປ້ອງ​ກັນ ​ແລະຄວບ​ຄຸມ​ການ​ລະ​ບາດ​ຂອງ​ພະ​ຍາດ​ໂຄ​ວິ​ດ-19 ຢູ່ສປປລາວ. ຝ່າຍ​ຈີນຍິນ​ດີ​ຮ່ວມ​ກັບ​ຝ່າ​ຍລາວ ​ເພີ່ມ​ທະວີ​ການ​ຮ່ວມ​ມື​ກັນ​ໃນ​ການ​ຕ້ານ​ການ​ລະ​ບາດ​ຂອງ​ພະຍາດ​ໂຄ​ວິດ-19, ພ້ອມ​ທັງ ​ເຊື່ອໝັ້ນ​ວ່າພາຍ​ໃຕ້​ຄວາມ​ພະຍາຍາມ​ຮ່ວມ​ກັນ​ຂອງ​ສອງ​ຝ່າຍຈີນ-ລາວກໍ​ຄືປະຊາ​ຄົມ​ສາກົນ, ພວກ​ເຮົາ​ຈະ​ສາມາດ​ພ້ອມ​ກັນຍາ​ດ​ໄດ້​ໄຊຊະນະ​ໃນ​ຂັ້ນ​ສຸດ​ທ້າຍ​ ຂອງການ​ຕໍ່ສູ້​ຕ້ານ​ການລະບາດ​ຂອງ​ພະຍາດດັ່ງກ່າວນີ້ໄດ້ຢ່າງແນ່ນອນ. 

    ຂ້າພະເຈົ້າຖືສຳຄັນລະດັບສູງໃນການເພີ່ມພູນຄູນສ້າງແລະເສີມຂະຫຍາຍສາຍພົວພັນລະຫວ່າງສອງພັກ, ສອງປະເທດຈີນ-ລາວ, ຍິນດີຮ່ວມກັບສະຫາຍພ້ອມກັນຊຸກຍູ້ການຈັດຕັ້ງປະຕິບັດຄວາມຮັບຮູ້ທີ່ເປັນເອກະພາບສຳຄັນຂອງສອງຝ່າຍ, ຊຸກຍູ້ການສ້າງຄູ່ຮ່ວມຊາຕາກຳຈີນ-ລາວໃຫ້ເດີນໜ້າດ້ວຍຄວາມໝັ້ນທ່ຽງ, ນໍາເອົາຜົນປະໂຫຍດມາສູ່ສອງປະເທດແລະປະຊາຊົນສອງຊາດໃຫ້ນັບມື້ນັບຫຼາຍຂຶ້ນກວ່າເກົ່າ.

ຂ້າພະເຈົ້າຮັບຊາບວ່າພັກປະຊາຊົນປະຕິວັດລາວຈະດຳເນີນກອງປະຊຸມໃຫຍ່ຄັ້ງທີXI ຂອງຕົນໃນຕົ້ນປີ 2021, ພັກກອມມູນິດຈີນຈະໃຫ້ການສະໜັບສະໜູນຕໍ່ການກະກຽມດຳເນີນກອງປະຊຸມໃຫຍ່ຄັ້ງທີXI ຂອງພັກປະຊາຊົນປະຕິວັດລາວ, ພ້ອມທັງສະແດງຄວາມເຊື່ອໝັ້ນແລະອວຍພອນໃຫ້ການຈັດກອງປະຊຸມໃຫຍ່ດັ່ງກ່າວປະສົບຜົນສຳເລັດຢ່າງຈົບງາມ; ຂໍສະແດງຄວາມຍິນດີຕ້ອນຮັບສະຫາຍເລຂາທິການໃຫຍ່ບຸນຍັງວໍລະຈິດມາຢ້ຽມຢາມສປຈີນໃນເວລາທີ່ທັງສອງຝ່າຍມີຄວາມສະດວກ, ຂ້າພະເຈົ້າຫວັງຢ່າງຍິ່ງວ່າຈະໄດ້ພົບກັບສະຫາຍອີກເທື່ອໃໝ່.

                                                   ວັນທີ 15 ມິຖຸນາ 2020

               ເລຂາທິການໃຫຍ່ຄະນະກຳມະການສູນກາງພັກກອມມູນິດຈີນ,

                    ປະທານປະເທດແຫ່ງສາທາລະນະລັດປະຊາຊົນຈີນ