ກອງປະຊຸມທາບທາມສ້າງແຜນກໍານົດພະນັກງານນໍາພາ-ຄຸ້ມຄອງ ຂັ້ນຄະນະພົວພັນຕ່າງປະເທດສູນກາງພັກ ຄຸ້ມຄອງ

ເຜີຍ​ແຜ່​ໂດຍ​: moderator ເວ​ລາ: 17/02/2026 11:33:08 ຈຳ​ນວນ​​ຢ້ຽມ​ຊົມ 678 ຄັ້ງ ​

      ວັນທີ​ 17 ກຸມພາ​ 2026,​ ຄະນະພົວພັນຕ່າງປະເທດສູນກາງພັກ​ ໄດ້ເປີດກອງປະຊຸມທາບທາມພະນັກງານນໍາພາ​-ຄຸ້ມຄອງ​ ຂັ້ນຄະນະພົວພັນຕ່າງປະເທດສູນກາງພັກ ຄຸ້ມຄອງ ຮອບທີ 1 ທີ່ ຄຕພ, ໂດຍການເປັນປະທານຂອງ ສະຫາຍ ບຸນເຫຼືອ ພັນດານຸວົງ, ກໍາມະການສູນກາງພັກ, ເລຂາຄະນະພັກ, ຫົວໜ້າຄະນະພົວພັນຕ່າງປະເທດສູນກາງພັກ, ເຊິ່ງມີ ຄະນະພັກ-ຄະນະນໍາ, ຄະນະໜ່ວຍພັກ, ຄະນະກົມ, ພະນັກງານສະມາຊິກພັກບໍານານ, ຄະນະພະແນກ ແລະ ພະນັກງານຂອງ ຄຕພ ເຂົ້າຮ່ວມຢ່າງພ້ອມພຽງ.

      ໃນກອງປະຊຸມ, ສະຫາຍ ປອ ວາລະໄຊ ເລັ່ງສະຫວັດ, ກໍາມະການສໍາຮອງສູນກາງພັກ, ຮອງເລຂາຄະນະພັກ, ຮອງຫົວໜ້າຄະນະພົວພັນຕ່າງປະເທດສູນກາງພັກ ໄດ້ຂຶ້ນຜ່ານມະຕິຂອງກົມການເມືອງສູນກາງພັກ ສະບັບເລກທີ 030, 032/ກມສພ, ບົດແນະນໍາ ສະບັບເລກທີ 292/ຄຈສພ ວ່າດ້ວຍ ມາດຕະຖານຂອງພະນັກງານ ແລະ ສ້າງແຜນກໍານົດພະນັກງານນໍາພາ-ຄຸ້ມຄອງ, ແລະ ດໍາລັດ 461/ລບ ວ່າດ້ວຍມາດຕະຖານຕໍາແໜ່ງບໍລິຫານຂອງລັດຖະກອນ ແຫ່ງ ສປປ ລາວ ເຊິ່ງໄດ້ເນັ້ນໃຫ້ເຫັນເຖິງບັນດາມາດຖານ-ເງື່ອນໄຂຂອງແຕ່ລະຕໍາແໜ່ງງານ, ຍົກໃຫ້ເຫັນເຖິງຄວາມໝາຍ, ຄວາມສໍາຄັນຂອງການສ້າງແຜນກໍານົດພະນັກງານນໍາພາ-ຄຸ້ມຄອງ ເປັນວຽກງານໜຶ່ງທີ່ສໍາຄັນພື້ນ ຖານຂອງວຽກງານພະນັກງານ ເພື່ອເປັນບ່ອນອີງ ທັງຍັງເປັນການຄາດຄະເນເປົ້າໝາຍຈັດວາງພະນັກງານເຂົ້າໃນຕໍາ ແໜ່ງງານນໍາພາ-ຄຸ້ມຄອງແຕ່ລະຂັ້ນ, ແນໃສ່ຮັບປະກັນລັກສະນະສືບທອດປ່ຽນແທນຕໍ່ເນື່ອງສະເພາະໜ້າ ແລະ ຍາວນານ, ຕອບສະໜອງໄດ້ທາງດ້ານຈໍານວນ, ຄຸນນະພາບ ແລະ ໂຄງປະກອບບຸກຄະລາກອນຄົບຊຸດ ຕາມຄວາມຮຽກ ຮ້ອງຕ້ອງການຂອງໜ້າທີ່ການເມືອງໃນຕໍ່ໜ້າ. ຈາກນັ້ນ, ກອງປະຊຸມ ຍັງໄດ້ຮັບຟັງການສະຫຼຸບຕີລາຄາການຈັດຕັ້ງປະຕິບັດວຽກງານ ສ້າງແຜນກໍານົດພະນັກງານນໍາພາ-ຄຸ້ມຄອງ ຕະຫຼອດໄລຍະ 05 ປີຜ່ານມາ, ນໍາສະເໜີໂດຍ ສະ ຫາຍ ນາງ ສຸກສະຫວັນ ແກ້ວວິໄລວັນ, ກໍາມະການຄະນະພັກ, ຮອງຫົວໜ້າກົມຈັດຕັ້ງ-ພະນັກງານ. ໃນໂອກາດດຽວກັນ ໃນກອງປະຊຸມຍັງໄດ້ດໍາເນີນການທາບທາມຢັ່ງຫາງສຽງ ເພື່ອເລືອກເຟັ້ນເອົາພະນັກງານນໍາພາ-ຄຸ້ມຄອງຂອງ ຄຕພ ເພື່ອບັນຈຸເຂົ້າໃນແຜນຕໍ່ໜ້ານີ້.

---