ຄະນະພົວພັນຕ່າງປະເທດສູນກາງພັກ

ສະຫາຍ ວາລະໄຊ ເລັ່ງສະຫວັດ, ຮອງຫົວໜ້າຄະນະພົວພັນຕ່າງປະເທດສູນກາງພັກ ປປ ລາວ ພົບປະທາງໄກກັບ ສະຫາຍ ຣັງເດີ ອິດສມາເອນ ເປຢາ ຣາມີເຣດສ, ກໍາມະການສູນກາງພັກ, ຫົວໜ້າພົວພັນຕ່າງປະເທດສູນກາງພັກສັງຄົມນິຍົມເອກະພາບເວເນຊູເອລ

ເຜີຍແຜ່ໂດຍ: moderator ເວລາ: 05/09/2024 15:08:53 ຈຳນວນຢ້ຽມຊົມ 121 ຄັ້ງ

ໃນຕອນເຊົ້າຂອງວັນທີ 05 ກັນຍາ 2024, ສະຫາຍ ວາລະໄຊ ເລັ່ງສະຫວັດ, ຮອງຫົວໜ້າຄະນະພົວພັນຕ່າງປະເທດສູນກາງພັກ ປປ ລາວ ໄດ້ພົບປະຜ່ານລະບົບວີດີໂອທາງໄກກັບ ສະຫາຍ ຣັງເດີ ອິດສມາເອນ ເປຢາ ຣາມີເຣດສ, ກໍາມະການສູນກາງພັກ, ຫົວໜ້າພົວພັນຕ່າງປະເທດສູນກາງພັກສັງຄົມນິຍົມເອກະພາບເວເນຊູເອລາ.

ໃນໂອກາດດັ່ງກ່າວ, ສະຫາຍ ວາລະໄຊ ເລັ່ງສະຫວັດ ໄດ້ສະແດງຄວາມປິຕິຍິນດີເປັນຢ່າງຍິ່ງ ທີ່ໄດ້ມີໂອກາດພົບປະຜ່ານວິດີໂອທາງໄກ ກັບ ສະຫາຍ ຣັງເດີ ເປຢາ, ຫົວໜ້າພົວພັນຕ່າງປະເທດສູນກາງພັກສັງຄົມນິຍົມເອກະພາບເວເນຊູເອລາ. ເຊິ່ງເປັນການພົບປະທາງໄກຄັ້ງທໍາອິດ ຂອງ ການນໍາຂັ້ນສູງຂອງສອງພັກ. ຝ່າຍລາວ ໄດ້ແຈ້ງສະພາບການທີ່ພົ້ນເດັ່ນຢູ່ ສປປ ລາວ ໃນໄລຍະຜ່ານມາ, ໂດຍສະເພາະ ການຈັດຕັ້ງປະຕິບັດມະຕິກອງປະຊຸມໃຫຍ່ ຄັ້ງທີ XI ຂອງ ພັກ ປປ ລາວ. ຊົມເຊີຍ ແລະ ຕີລາຄາສູງຕໍ່ຜົນສຳເລັດຫຼາຍດ້ານ ທີ່ປະຊາຊົນເວເນຊູເອລາອ້າຍນ້ອງ ຍາດມາໄດ້ຕະຫຼອດໄລຍະຜ່ານມາ ພາຍໃຕ້ການນໍາພາ ຂອງພັກສັງຄົມນິຍົມເອກະພາບເວເນຊູເອລາ, ໂດຍສະເພາະແມ່ນ ຜົນສຳເລັດທີ່ມີຄວາມໝາຍຄວາມສຳຄັນໃນການພັດທະນາເສດຖະກິດ-ສັງຄົມ ແລະ ປົກປັກຮັກສາໝາກຜົນຂອງການປະຕິວັດ ໃນທ່າມກາງການປິດລ້ອມຂອງຈັກກະພັດ ແລະ ອິດທິກຳລັງປໍລະປັກ. ຕີລາຄາສູງຕໍ່ສາຍພົວພັນມິດຕະພາບ ລະຫວ່າງ ສອງພັກ, ສອງລັດ ແລະ ປະຊາຊົນສອງຊາດ ລາວ-ເວເນຊູເອລາ, ຊຶ່ງໄດ້ຮັບການເສີມຂະຫຍາຍໃຫ້ນັບມື້ນັບແໜ້ນແຟ້ນຍິ່ງໆຂື້ນ, ປະກອບສ່ວນສຳຄັນເຂົ້າໃນພາລະກິດປະຕິວັດຢູ່ສອງປະເທດລາວ ແລະ ເວເນຊູເອລາ ກໍຄື ພາລະກິດ ສັນຕິພາບ, ມິດຕະພາບ ແລະ ການຮ່ວມມື ເພື່ອການພັດທະນາໃນພາກພື້ນ ແລະ ໃນໂລກ. ສະແດງຄວາມຊົມເຊີຍ ແລະ ຕີລາຄາສູງ ຕໍ່ໄຊຊະນະ ຂອງພັກສັງຄົມນິຍົມເອກະພາບເວເນຊູເອລາ ໃນການເລືອກຕັ້ງປະທານາທິບໍດີເວເນຊູເອລາ ນໍາໂດຍ ສະຫາຍ ນິໂກລາດສ ມາດູໂຣ.

ສະຫາຍ ຣັງເດີ ເປຢາ ໄດ້ແຈ້ງໃຫ້ຊາບສະພາບການພົ້ນເດັ່ນ ຂອງເວເນຊູເອລາ ສະແດງຄວາມຊົມເຊີຍ ແລະ ຕີລາຄາສູງຕໍ່ບັນດາຜົນສຳເລັດ ຂອງ ສປປ ລາວ ທີ່ຍາດມາໄດ້ ໃນພາລະກິດປົກປັກຮັກສາ ແລະ ສ້າງສາພັດທະນາປະ ເທດຊາດ ພາຍໃຕ້ການນຳພາອັນຖືກຕ້ອງ ແລະ ສະຫຼາດສ່ອງໃສ ຂອງ ພັກ ປປ ລາວ, ອັນໄດ້ເຮັດໃຫ້ຊີວິດການເປັນຢູ່ຂອງປະຊາຊົນລາວ ໄດ້ຮັບການປັບປຸງໃຫ້ດີຂຶ້ນເທື່ອລະກ້າວ; ບົດບາດ ແລະ ອິດທິພົນ ຂອງ ພັກ ແລະ ລັດຖະບານ ສປປ ລາວ ນັບມື້ສູງເດັ່ນຂື້ນໃນເວທີພາກພື້ນ ແລະ ສາກົນ. ພ້ອມທັງເຊື່ອໝັ້ນວ່າ ພາຍໃຕ້ການນໍາພາອັນຖືກຕ້ອງ ຂອງ ພັກ ປປ ລາວ ຈະສາມາດສືບຕໍ່ປະສົບຜົນສຳເລັດໃນພາລະກິດປົກປັກຮັກສາ ແລະ ສ້າງສາພັດທະນາປະເທດຊາດ ແລະ ຍາດໄດ້ຜົນສໍາເລັດອັນໃຫຍ່ຫຼວງກວ່າເກົ່າ ຕາມມະຕິກອງປະຊຸມໃຫຍ່ ຄັ້ງທີ XI ໄດ້ກໍານົດໄວ້.

ໃນການພົບປະຄັ້ງນີ້, ສອງຝ່າຍ ໄດ້ຕີລາຄາສູງຕໍ່ການພົວພັນຮ່ວມມືສອງຝ່າຍ ໃນໄລຍະຜ່ານມາ ແລະ ປຶກສາຫາລື ກ່ຽວກັບ ທິດທາງໃນການເສີມຂະຫຍາຍສາຍພົວພັນຮ່ວມມືໃນຕໍ່ໜ້າ ພ້ອມທັງໄດ້ແລກປ່ຽນທັດສະນະກ່ຽວກັບບັນຫາພາກພື້ນ ແລະ ສາກົນ ທີ່ທັງສອງຝ່າຍມີຄວາມສົນໃຈ.

ພັກສັງຄົມນິຍົມເອກະພາບເວເນຊູເອລາ PSUV, ສ້າງຕັ້ງຂື້ນໃນວັນທີ 24/03/2007 ເປັນພັກຝ່າຍຊ້າຍ ຍຶດໝັ້ນລັດທິສັງຄົມນິຍົມສັດຕະວັດທີ 21, ເດີນຕາມແນວທາງລັດທິມາກຊິດສໃໝ່, ໂບລິວານິດ, ຈາວິດສໂມ ແລະ ປະຊາທິປະໄຕສັງຄົມນິຍົມ ພັກ PSUV ເລີ່ມມີການພົວພັນ ກັບ ພັກປປ ລາວ ໃນປີ 2014; ໃນໄລຍະຜ່ານມາ, 2 ພັກມີການພົວພັນກັນລັກສະນະຕໍ່ເນື່ອງ ແລະ ປົກກະຕິ ໂດຍຮູບແບບຂອງການພົວພັນສ່ວນໃຫຍ່ ແມ່ນການສົ່ງສານອວຍພອນວັນສໍາຄັນເຊິ່ງກັນ ແລະ ກັນ.