ຄະນະພົວພັນຕ່າງປະເທດສູນກາງພັກ ຈັດພິທີ ມອບ-ຮັບ ໃບຢັ້ງຢືນໜ່ວຍພັກປອດໃສ, ເຂັ້ມແຂງ, ໜັກແໜ້ນ ປະຈຳປີ 2023

ເຜີຍ​ແຜ່​ໂດຍ​: moderator ເວ​ລາ: 07/03/2024 16:01:42 ຈຳ​ນວນ​​ຢ້ຽມ​ຊົມ 1163 ຄັ້ງ ​

        ໃນວັນ​ທີ 7 ມີນາ 2024 ທີ່ ​ຄະ​ນະ​ພົວ​ພັນ​ຕ່າງ​ປະເທດ​ສູນ​ກາງ​ພັກ (ຄຕພ) ໄດ້ຈັດພິທີ ມອບ-ຮັບໃບຢັ້ງຢືນ  ໜ່ວຍພັກປອດໃສ, ເຂັ້ມແຂງ, ໜັກແໜ້ນ ແລະ ມອບໃບຢັ້ງຢືນ ກຳມະບານ 5 ເປັນເຈົ້າ ປະຈຳປີ 2023 ພາຍໃຕ້ການເປັນປະທານ ຂອງ ສະຫາຍ ທອງສະຫວັນ ພົມວິຫານ, ກຳມະການສູນກາງພັກ, ເລຂາຄະນະພັກ ຫົວ​ໜ້າ​ຄະນະພົວພັນຕ່າງປະເທດສູນກາງພັກ ມີບັນດາສະຫາຍໃນຄະນະພັກ, ບັນດາຄະນະໜ່ວຍພັກ ແລະ ສະມາຊິກພັກ ຂັ້ນພະແນກ ພ້ອມດ້ວຍພະນັກງານເຂົ້າຮ່ວມທັງໝົດ ຈຳນວນ  130 ສະຫາຍ;

        ໃນພິທີ ສະຫາຍ ເກີລໍ ຢ່າງກໍ່ ກຳມະການຄະນະພັກ, ຫົວໜ້າກົມຈັດຕັ້ງ-ພະນັກງານ ໄດ້ຂື້ນຜ່ານບົດສະຫຼຸບຜົນການຈັດຕັ້ງປະຕິບັດໜ່ວຍພັກປອດໃສ, ເຂັ້ມແຂງ, ໜັກແໜ້ນ ປະຈຳປີ 2023 ແລະ ທິດທາງແຜນການ ຂອງບັນດາໜ່ວຍພັກ ຄຕພ.

       ສະຫາຍ ທອງສະຫວັນ ພົມວິຫານ ໄດ້ໃຫ້ກຽດມອບໃບຢັ້ງຢືນ ໜ່ວຍພັກປອດໃສ, ເຂັ້ມແຂງ, ໜັກແໜ້ນ ໃຫ້ 3 ໜ່ວຍພັກ ແລະ ມອບໃບຢັ້ງຢືນ ກຳມະບານ 5 ເປັນເຈົ້າ ປະຈຳປີ 2023 ໃຫ້ສະຫະພັນກຳມະບານ ຄຕພ ພ້ອມທັງ ໄດ້ໂອ້ລົມຕໍ່ທີ່ປະຊຸມ ໂດຍສະແດງຄວາມຊົມເຊີຍຕໍ່ຜົນ ສຳເລັດຂອງທັງ 03 ໜ່ວຍພັກ ທີ່ໄດ້ມີຄວາມພະຍາມ ແລະ ເຊີດຊູຄວາມຮັບຜິດຊອບສູງໃນການຮັກສານາມມະຍົດ ແລະ ກໍ່ສ້າງໜ່ວຍພັກປອດໃສ, ເຂັ້ມແຂງ, ໜັກແໜ້ນ ປະຈຳປີ 2023; ໜ່ວຍພັກຫ້ອງການ ສາມາດສຶບຕໍ່ຮັກສາໄດ້ນາມມະຍົດ ເປັນສະໄໝທີ 7, ໜ່ວຍພັກ ກົມຈັດຕັ້ງ-ພະນັກງານ ແລະ ໜ່ວຍພັກ ກົມ ຄົ້ນຄວ້າ ແລະ ພົວພັນຫຼາຍຝ່າຍ ກໍ່ສາມາດສ້າງໜ່ວຍພັກຕົນເປັນໜ່ວຍພັກປອດໃສ, ເຂັ້ມແຂງ, ໜັກແໜ້ນ; ສະຫາຍ ຫົວໜ້າ ຄຕພ ໄດ້ຮຽກຮ້ອງໃຫ້ໜ່ວຍພັກທີ່ບໍ່ສາມາດກໍ່ສ້າງເປັນໜ່ວຍພັກປອດໃສ, ເຂັ້ມແຂງ, ໜັກແໜ້ນ ໃນປີນີ້ຈົ່ງເອົາໃຈໃສເພີ່ມທະວີການກໍ່ສ້າງໜ່ວຍພັກປອດໃສ, ເຂັ້ມແຂງ, ໜັກແໜ້ນ ໃຫ້ຖືກຂັ້ນຕອນ ແລະ ເງື່ອນໄຂ ທີ່ນິຕິກຳໄດ້ວາງອອກ. ສຳລັບ 03 ໜ່ວຍພັກ ທີ່ໄດ້ຖືກຮັບຮອງໃນປີນີ້ ຈົ່ງເພີ່ມທະວີການຮັກສາໜ່ວຍພັກ ຂອງຕົນໃຫ້ເປັນ ໜ່ວຍພັກປອດໃສ, ເຂັ້ມແຂງ, ໜັກແໜ້ນ ຫຼາຍປີເທົ່າໃດຍິ່ງດີ.

---