ພັກປະຊາຊົນປະຕິວັດລາວ ເສີມຂະຫຍາຍ ການພົວພັນຮ່ວມມື ກັບພັກເສລີປະຊາທິປະໄຕອຸດສະເບກິດສະຖານ

ເຜີຍ​ແຜ່​ໂດຍ​: moderator ເວ​ລາ: 10/11/2026 18:23:33 ຈຳ​ນວນ​​ຢ້ຽມ​ຊົມ 74 ຄັ້ງ ​

      ໃນວັນທີ 5 ພະຈິກ 2026, ສະຫາຍ ວາລະໄຊ ເລັ່ງສະຫວັດ, ກຳມະການສຳຮອງສູນກາງພັກ, ຮອງຫົວໜ້າຄະນະພົວພັນຕ່າງປະເທດສູນກາງພັກ ພ້ອມດ້ວຍຄະນະ ໄດ້ພົບປະກັບ ທ່ານ ອັກຕາມ ຄາອິຕອຟ (Aktam Khaitov), ປະທານຄະນະກໍາມະການບໍລິຫານສະພາການເມືອງພັກເສລີປະຊາທິປະໄຕອຸດສະເບກິດສະຖານ (O'zLiDeP) ໃນໂອກາດທີ່ສອງຝ່າຍເຂົ້າຮ່ວມກອງປະຊຸມໃຫຍ່ຂອງອົງການກອງປະຊຸມສາກົນຂອງບັນດາພັກການເມືອງໃນອາຊີ (International Conference of Asian Political Parties ຫຼື ICAPP) ຄັ້ງທີ 13 ທີ່ນະຄອນຫຼວງເຊອຸນ, ສ.ເກົາຫຼີ.

      ການພົບປະ ສອງຝ່າຍ ໄດ້ທົບທວນຄືນ ແລະ ຕີລາຄາສູງຕໍ່ການພົວພັນມິດຕະພາບ ລະຫວ່າງ ສອງພັກ, ສອງລັດ ລາວ-ອຸດສະເບກິດສະຖານ ອັນເປັນມູນເຊື້ອ ມາແຕ່ສະໄໝອະດີດສະຫະພາບໂຊວຽດ ແລະ ປືກສາຫາລືທິດທາງການເສີມຂະຫຍາຍສາຍພົວພັນ ໃນຕໍ່ໜ້າ, ພ້ອມນີ້ ສອງຝ່າຍ ໄດ້ເນັ້ນໜັກທິດທາງ ແລະ ການສ້າງກົົນໄກການພົວພັນທີ່ສຳຄັນຕິດຕໍ່ພົວພັນກັນ ເປັນຕົ້ນ: ການແລກປ່ຽນຄະນະ ລະຫວ່າງ ສອງພັກ ຢ່າງເປັນປົກກະຕິ, ການຮ່ວມມືດ້ານຂົງເຂດວຽກງານສະພາ, ການຊຸກຍູ້ການຮ່ວມມືຢ່າງຕັ້ງໜ້າຂອງອົງການຈັດຕັ້ງມະຫາຊົນ (ໂດຍສະເພາະ ຊາວໜຸ່ມ ແລະ ແມ່ຍິງ) ເພື່ອຖອດຖອນບົດຮຽນເຊິ່ງກັນ ແລະ ກັນ, ພ້ອມທັງເປັນຂົວຕໍ່ໃນການເຊື່ອມໂຍງເສດຖະກິດ ແລະ ສັງຄົມຂອງສອງປະເທດ ໃຫ້ເປັນຮູບປະທຳ.

     ໃນຕອນທ້າຍ, ສອງຝ່າຍໄດ້ພ້ອມກັນ ຢືນຢັນເຖິງເຈດຈຳນົງ ໃນການສະໜັບສະໜູນເຊິ່ງກັນ ແລະ ກັນ ໃນເວທີສາກົນ, ເຊິ່ງການພົບປະຄັ້ງນີ້ ຖືເປັນບາດກ້າວຍຸດທະສາດອັນສຳຄັນ ໃນການເສີມຂະຫຍາຍ ແລະ ຮັດແໜ້ນສາຍພົວພັນຮ່ວມມືດ້ານພັກ ກໍຄືການຊຸກຍູ້ການພົວພັນ ສອງຊາດ ລາວ-ອຸດສະເບກິດສະຖານ ໃນຕໍ່ໜ້າ ໃຫ້ເຂັ້ມແຂງ ແລະ ໜັກແໜ້ນ ຍິ່ງໆຂຶ້ນ ເພື່ອນຳເອົາຜົນປະໂຫຍດສູງສຸດມາສູ່ປະຊາຊົນສອງຊາດ.

---