ຄະນະພົວພັນຕ່າງປະເທດສູນກາງພັກ ເຂົ້າຢ້ຽມຊົມອະນຸສອນສະຖານ ປະທານ ສຸພານຸວົງ ເນື່ອງໃນໂອກາດວັນຄ້າຍວັນເກີດ ຄົບຮອບ 117 ປີ (13/07/1909-13/07/2026)

ເຜີຍ​ແຜ່​ໂດຍ​: moderator ເວ​ລາ: 16/07/2026 13:12:35 ຈຳ​ນວນ​​ຢ້ຽມ​ຊົມ 65 ຄັ້ງ ​

      ໃນຕອນບ່າຍຂອງວັນທີ 9 ກໍລະກົດ 2026, ສະ​ມາຊິກ 3 ອົງການຈັດຕັ້ງມະຫາຊົນ ຄະນະພົວພັນຕ່າງປະເທດສູນກາງພັກ ຈຳນວນ 30 ສະຫາຍ ນຳໂດຍ ສະຫາຍ ວົງຄຳ ແສນສະທິດ, ກໍາມະການຄະນະ ພັກ, ຫົວໜ້າກົມເອີຣົບ-ອາເມຣິກາ, ເລຂາຄະນະບໍລິຫານງານຊາວໜຸ່ມ ຄຕພ ພ້ອມດ້ວຍບັນດາສະຫາຍຄະນະບໍລິຫານງານ, ຄະນະໜ່ວຍ ​ແລະ ສະ​ມາ​ຊິກ ຂອງ​ສາມ​ອົງ​ການ​ຈັດ​ຕັ້ງ​ມະ​ຫາ​ຊົນ ໄດ້ເຂົ້າຢ້ຽມຊົມອະ ນຸສອນສະຖານ ປະທານ ສຸພານຸວົງ.

   ການຢ້ຽມຊົມຄັ້ງນີ້ ແມ່ນເພື່ອຫວນຄືນເຖິງຊີວິດ, ພາລະກິດປະຕິວັດ ແລະ ຄຸນງາມຄວາມດີອັນໃຫຍ່ຫຼວງຂອງ ປະທານ ສຸພານຸວົງ ຜູ້ນຳທີ່ແສນເຄົາລົບຮັກຂອງປວງຊົນລາວທັງຊາດ, ຜູ້ທີ່ໄດ້ອຸທິດທັງຊີວິດເພື່ອພາລະກິດການສູ້ປົດປ່ອຍຊາດ, ພາລະກິດປົກປັກຮັກສາ ແລະ ສ້າງສາພັດທະນາປະເທດຊາດ ໃຫ້ມີຄວາມຈະເລີນຮຸ່ງເຮືອງສືບທອດເຖິງປັດຈຸບັນ. ໃນການຢ້ຽມຊົມຄັ້ງນີ້, ຄະນະໄດ້ຮັບຟັງການບັນຍາຍກ່ຽວກັບປະຫວັດ, ຊີວິດ, ການເຄື່ອນໄຫວປະຕິວັດ, ຜົນງານອັນໂດດເດັ່ນ ແລະ ບົດຮຽນອັນມີຄຸນຄ່າຂອງ ປະທານ ສຸພານຸວົງ ພ້ອມທັງໄດ້ຢ້ຽມຊົມຮູບພາບ, ເອກະສານ, ວັດຖຸພັນ ແລະ ຂໍ້ມູນສຳຄັນຕ່າງໆ ທີ່ສະທ້ອນໃຫ້ເຫັນເຖິງຄຸນສົມບັດສິນທໍາປະຕິວັດ, ແບບແຜນການດໍາລົງຊີວິດ, ນ້ຳໃຈຮັກຊາດ, ຄວາມເສຍສະຫຼະ, ຄວາມກ້າຫານ ໃນຕໍ່ພາລະກິດຂອງພັກ, ຂອງຊາດ ແລະ ຂອງປະຊາຊົນ. ກິດຈະກຳດັ່ງກ່າວ ຖືເປັນການສຶກສາອົບຮົມດ້ານການເມືອງ-ແນວຄິດ ແລະ ປູກຝັງຈິດສຳນຶກຮັກຊາດໃຫ້ແກ່ພະນັກງານ ຄະນະພົວພັນຕ່າງປະເທດສູນກາງພັກ ໄດ້ຄົ້ນຄວ້າເຊື່ອມຊຶມຮໍ່າຮຽນເອົາແບບຢ່າງຄຸນສົມບັດສິນທຳປະຕິວັດຂອງ ປະທານ ສຸພານຸວົງ ເພື່ອນໍາໃຊ້ເຂົ້າໃນການປະຕິບັດວຽກງານ ແລະ ດໍາລົງຊີວິດຕົວຈິງ.

---