ຫົວໜ້າຄະນະພົວພັນຕ່າງປະເທດສູນກາງພັກ ມອບສານອວຍພອນວັນສ້າງຕັ້ງພັກກອມູນິດຈີນ ຄົບຮອບ 105 ປີ

ເຜີຍ​ແຜ່​ໂດຍ​: moderator ເວ​ລາ: 01/07/2026 19:59:44 ຈຳ​ນວນ​​ຢ້ຽມ​ຊົມ 48 ຄັ້ງ ​

 

        ໃນຕອນເຊົ້າຂອງວັນທີ 01 ກໍລະກົດ 2026, ທີ່ສະຖານທູດ ສປ ຈີນ ປະຈຳ ສປປ ລາວ, ສະຫາຍ ບຸນເຫຼືອ ພັນດານຸວົງ, ກຳມະການສູນກາງພັກ, ຫົວໜ້າຄະນະພົວພັນຕ່າງປະເທດສູນກາງພັກ ປປ ລາວ ໄດ້ນໍາພາຄະນະ ເຂົ້າຊົມເຊີຍ ແລະ ມອບສານອວຍພອນຈາກ ຄະນະບໍລິຫານງານສູນກາງພັກ ປປ ລາວ ເຖິງ ຄະນະກໍາມະການສູນກາງພັກກອມມູນິດຈີນ ຜ່ານເອກອັກຄະລັດຖະທູດຈີນ ສປ ຈີນ ປະຈຳ ສປປ ລາວ ເນື່ອງໃນໂອກາດວັນສ້າງຕັ້ງພັກກອມມູນິດຈີນ ຄົບຮອບ 105 ປີ (1/7/1921-1/7/2026), ໂດຍໄດ້ຮັບການຕ້ອນຮັບ ຈາກ ສະຫາຍ ນາງ ຟາງຫົງ, ເອກອັກຄະລັດຖະທູດວິສາມັນຜູ້ມີອໍານາດເຕັມ ແຫ່ງ ສປ ຈີນ ປະຈຳ ສປປ ລາວ ພ້ອມດ້ວຍຄະນະ.

      ສະຫາຍ ບຸນເຫຼືອ ພັນດານຸວົງ ໄດ້​ສະ​ແດງ​ຄວາມ​ຊົມ​ເຊີຍ​ຢ່າງ​ສຸດ​ໃຈ​ຕໍ່​ພັກ​ກອມ​ມູ​ນິດ​ຈີນ ​ທີ່​ໄດ້​ນຳ​ພາ​ປະ​ຊາ​ຊົນ​ຈີນ ​ບັນ​ລຸ​ຜົນ​ສຳ​ເລັດ​ອັນ​ມະ​ຫັດ​ສະ​ຈັນຢ່າງຮອບດ້ານ ​ທີ່ປະ​ຈັກ​ຕາ​​ຕໍ່​ຊາວ​ໂລກ​ຕະ​ຫຼອດ​ໄລ​ຍະ 105 ປີ​ຜ່ານ​ມາ, ໂດຍ​ສະ​ເພາະ​​ນັບ​ແຕ່ກອງ​ປະ​ຊຸມ​ໃຫຍ່​ຜູ້​ແທນ​ທົ່ວ​ປະ​ເທດ​ ຄັ້ງ​ທີ 18 ຂອງ​ພັກ​ກອມ​ມູ​ນິດ​ຈີນ​ເປັນ​ຕົ້ນ​ມາ. ພ້ອມດຽວກັນນັ້ນ, ກໍ່ໄດ້ສະ​ແດງ​ຄວາມ​ເຊື່ອ​ໝັ້ນ​ຢ່າງ​ໜັກ​ແໜ້ນວ່າ ​ພາຍ​ໃຕ້​ການ​ນຳ​ພາ​ອັນ​ເຂັ້ມ​ແຂງ​ຂອງ ​ຄະ​ນະ​ກຳ​ມະ​ການ​ສູນ​ກາງ​ພັກກອມ​ມູ​ນິດ​ຈີນ ທີ່​​ມີ ສະຫາຍ ສີ​ຈິ້ນ​ຜິງ ເປັນ​ແກນ​ນຳ, ປະ​ຊາ​ຊົນ​ຈີນ ​ຈະ​ສາ​ມາດ​ສ້າງ​ປະ​ເທດ​ສັງ​ຄົມ​ນິ​ຍົມ​ທັນ​ສະ​ໄໝ​ໃຫ້​ສຳ​ເລັດ​ຕາມ​ເວ​ລາ​ຢ່າງ​ແນ່ນອນ ແລະ ​ບັນ​ລຸ​ເປົ້າ​ໝາຍ​ສູ້​ຊົນ 100 ປີ​ເຫດ​ການ​ທີ​ສອງ​ຢ່າງ​ສຳ​ເລັດ​ຜົນ.

      ສະຫາຍ ນາງ ຟາງຫົງ ໄດ້ສະແດງຄວາມຂອບໃຈ ຕໍ່ ສະຫາຍ ບຸນເຫຼືອ ພັນດານຸວົງ ທີ່ໄດ້ໃຫ້ກຽດມາມອບສານອວຍພອນ ແລະ ຕີລາຄາສູງການຢ້ຽມຢາມທາງລັດຖະກິດຂອງ ສະຫາຍ ທອງລຸນ ສີສຸລິດ, ເລຂາທິການໃຫຍ່, ປະທານປະເທດລາວ ໃນຕົ້ນເດືອນມິຖຸນາ 2026 ຜ່ານມາ, ໂດຍສະເພາະການອອກຖະແຫຼງການຮ່ວມ ໃນການຈັດຕັ້ງປະຕິບັດແຜນແມ່ບົດ ວ່າດ້ວຍການສ້າງຄູ່ຮ່ວມຊາຕາກຳ ລາວ-ຈີນ ທີ່ເຂັ້ມແຂງໜຽວແໜ້ນໃນທຸກສະພາບການຂອງຍຸກໃໝ່ ທີ່ເປັນການຍົກລະດັບການຮ່ວມມືສອງຝ່າຍ; ພ້ອມທັງສະແດງຄວາມຂອບໃຈຕໍ່ ຄະນະພົວພັນຕ່າງປະເທດສູນກາງພັກ ປປ ລາວ ທີ່ໄດ້ມີການປະສານສົມທົບ ແລະ ຮ່ວມໄມ້ຮ່ວມມືເປັນຢ່າງດີກັບ ສະຖານທູດຈີນ ໃນການຢ້ຽມຢາມດັ່ງກ່າວ, ສອງຝ່າຍຍິນດີສືບຕໍ່ປະສານສົມທົບຢ່າງແໜ້ນແຟ້ນໃນການຈັດຕັ້ງຜັນຂະຫຍາຍ ໝາກຜົນຂອງການຢ້ຽມຢາມດັ່ງກ່າວ ໃຫ້ປະກົດຜົນເປັນຮູບປະທໍາ.

---