ຮອງຫົວໜ້າຄະນະພົວພັນຕ່າງປະເທດສູນກາງພັກ ເຂົ້າຢ້ຽມຂໍ່ານັບການນຳຂັ້ນສູງຂອງ ພັກປະຊາຊົນມົງໂກລີ.

ເຜີຍ​ແຜ່​ໂດຍ​: moderator ເວ​ລາ: 29/06/2026 09:02:42 ຈຳ​ນວນ​​ຢ້ຽມ​ຊົມ 28 ຄັ້ງ ​

     ໃນວັນທີ 26 ມິຖຸນາ 2026, ສະຫາຍ ວາລະໄຊ ເລັ່ງສະຫວັດ, ກຳມະການສໍາຮອງສູນກາງພັກ, ຮອງຫົວຫນ້າຄະນະພົວພັນຕ່າງປະເທດສູນກາງພັກ, ໄດ້ນຳພາຄະນະ ເຂົ້າພົບຢ້ຽມຂໍ່ານັບ ສະຫາຍ ຢັງກຸກ ຊອດບາທາຣ໌ (Yangug Sodbaatar), ເລຂາທິການໃຫຍ່ພັກປະຊາຊົນມົງໂກລີ (Mongolian People’s Party), ໃນໂອກາດເຂົ້າຮ່ວມກອງປະຊຸມຄະນະປະຈໍາ ຂອງອົງການກອງປະຊຸມສາກົນ ຂອງບັນດາພັກການເມືອງໃນອາຊີ ຄັ້ງທີ 45 (The 45^th Meeting of the ICAPP Standing Committee) ທີ່ ນະຄອນຫຼວງອູລານບາຕໍ, ປະເທດມົງໂກລີ.

     ໃນໂອກາດດັ່ງກ່າວ, ສະຫາຍ ວາລະໄຊ ເລັ່ງສະຫວັດ ໄດ້ສະແດງຄວາມຂອບໃຈຕໍ່ການຕ້ອນຮັບອັນອົບອຸ່ນຂອງ ພັກປະຊາຊົນມົງໂກລີ ແລະ ສະແດງຄວາມຊົມເຊີຍຕໍ່ຜົນສໍາເລັດ ໃນການເປັນເຈົ້າພາບຈັດກອງປະຊຸມຄະນະປະຈໍາໄອແຄັບ ຄັ້ງທີ 45 ແລະ ກອງປະຊຸມປິ່ນອ້ອມ. ພ້ອມນັ້ນ, ຍັງໄດ້ຕີລາຄາສູງຕໍ່ສາຍພົວພັນມິດຕະພາບທີ່ເປັນມູນເຊື້ອອັນດີງາມ ລະຫວ່າງ ສອງພັກ, ສອງລັດ ແລະ ປະຊາຊົນສອງຊາດ ລາວ-ມົງໂກລີ ຕະຫຼອດໄລຍະຜ່ານມາ ນັບແຕ່ການສ້າງຕັ້ງສາຍພົວພັນທາງການທູດ ໃນປີ1962 ກໍຄື ການສະໜັບສະໜູນເຊິ່ງກັນແລະກັນ ທັງໃນຂອບການຮ່ວມມືລະດັບພາກພື້ນ ແລະ ສາກົນ. ນອກນັ້ນ, ຍັງໄດ້ແຈ້ງໃຫ້ຊາບໂດຍຫຍໍ້ ກ່ຽວກັບ ຜົນກອງປະຊຸມໃຫຍ່ ຄັ້ງທີ XII ຂອງພັກ ປປ ລາວ ໃນຕົ້ນປີ 2026 ແລະ ຢືນຢັນຈະສືບຕໍ່ເສີມຂະຫຍາຍສາຍພົວພັນດ້ານພັກ ແລະ ການທູດປະຊາຊົນ ເພື່ອສົ່ງເສີມຄວາມເຂົ້າໃຈລະຫວ່າງປະຊາຊົນສອງຊາດ; ຊຸກຍູ້ການຮ່ວມມືທາງດ້ານເສດຖະກິດ, ການຄ້າ, ການສຶກສາ, ການທ່ອງທ່ຽວ ແລະ ການພັດທະນາດີຈີຕອນ.

     ສະຫາຍ ຢັງກຸກ ຊອດບາທາຣ໌, ໄດ້ສະແດງການຕ້ອນຮັບອັນອົບອຸ່ນ ແລະ ຕີລາຄາສູງຕໍ່ການມາຢ້ຽມຢາມ-ເຮັດວຽກ ທີ່ ມົງໂກລີ ຂອງຄະນະໃນຄັ້ງນີ້ ຊຶ່ງຖືເປັນການປະກອບສ່ວນເຂົ້າໃນການຮັດແໜ້ນສາຍພົວພັນມິດຕະພາບ ລະຫວ່າງ ສອງປະເທດ ມົງໂກລີ-ລາວ, ສະແດງອອກໃນການແລກປ່ຽນຢ້ຽມຢາມຂອງຄະນະຜູ້ແທນໃນລະດັບຕ່າງໆ ແລະ ການແລກປ່ຽນສານອວຍພອນເນື່ອງໃນໂອກາດສໍາຄັນຕ່າງໆ. ພິເສດ, ສະຫາຍ ຍັງໄດ້ສະແດງຄວາມຊົມເຊີຍຕໍ່ຜົນສໍາເລັດກອງປະຊຸມໃຫຍ່ ຄັ້ງທີ XII ຂອງພັກ ປປ ລາວ, ບັນດາຜົນງານການນໍາພາຂອງພັກ ປປ ລາວ ຕະຫຼອດໄລຍະ 70 ປີ ຜ່ານມາ. ພ້ອມທັງ, ສະແດງຄວາມຍິນດີໃນການແລກປ່ຽນບົດຮຽນ ກ່ຽວກັບ ການພັັດທະນາດີຈີຕອນ ແລະ ລະບົບເອເລັກໂຕຣນິກ ຂອງມົງໂກລີ ໃຫ້ແກ່ ສປປ ລາວ.

---