ຄຕພ ສຳເລັດຊຸດຝຶກອົບຮົມວຽກງານຄົ້ນຄວ້າ

ເຜີຍ​ແຜ່​ໂດຍ​: moderator ເວ​ລາ: 26/06/2026 16:26:48 ຈຳ​ນວນ​​ຢ້ຽມ​ຊົມ 27 ຄັ້ງ ​

    ໃນວັນທີ 23-25/06/2026, ຄະ​ນະ​ພົວ​ພັນ​ຕ່າງ​ປະ​ເທດ​ສູນ​ກາງ​ພັກ (ຄຕພ) ໄດ້​ຈັດ​ຊຸດ​ຝຶກ​ອົບ​ຮົມ​ວຽກ​ງານ​ຄົ້ນຄວ້າ ໃຫ້ແກ່ພະນັກງານພາຍໃນຄະນະພົວພັນຕ່າງປະເທດສູນກາງພັກ ແລະ ມີພະນັກງານ ຈາກບັນດາອົງການອ້ອມຂ້າງສູນກາງພັກ, ສູນກາງແນວລາວສ້າງຊາດ, ສະຫະພັນນັກຮົບເກົ່າແຫ່ງຊາດລາວ, ອົງການຈັດຕັ້ງມະຫາຊົນຂັ້ນສູນກາງ, ຫ້ອງການກະຊວງການຕ່າງປະເທດ, ສະຖາບັນການຕ່າງປະເທດ ເຂົ້າຮ່ວມຝຶກອົບຮົມໃນຄັ້ງນີ້ ລວມທັງໝົດ 30 ທ່ານ. ມີ​ວິ​ທະ​ຍາ​ກອນ 03 ທ່ານ ຈາກສູນສົ່ງເສີມວາລະສານວິທະຍາສາດ, ມະຫາວິທະຍາໄລແຫ່ງຊາດລາວ ມາ​ຖ່າຍທອດປະສົບການ ແລະ ບົດຮຽນກ່ຽວກັບວຽກງາານດັ່ງກ່າວ. ຈຸດ​ປະ​ສົງ​ຂອງ​ການ​ຝຶກ​ອົບ​ຮົມ​ຄັ້ງ​ນີ້ ເພື່ອປະຕິບັດຕາມແຜນງານ ໂຄງການຂອງກົມຄົ້ນຄວ້າ ແລະ ພົວພັນຫຼາຍຝ່າຍ ກໍຄືຂອງຄະນະພົວພັນຕ່າງປະເທດສູນກາງພັກ ແລະ ເພື່ອຍົກລະດັບຄວາມເຂົ້າໃຈ ກ່ຽວກັບ ວຽກງານຄົ້ນຄວ້າ ໂດຍສະເພາະແມ່ນ ການຄົ້ນຄວ້າວິທະຍາສາດບັນດາຫົວຂໍ້ທີ່ກ່ຽວຂ້ອງກັບວຽກງານຕົວຈິງ ຂອງບັນດາອົງການທີ່ເຂົ້າຮ່ວມຊຸດຝຶກອົບຮົມຄັ້ງນີ້.

     ໃນ​ໄລ​ຍະ​ຝຶກ​ອົບ​ຮົມ,​ ນັກສຳ​ມະ​ນາ​ກອນ ໄດ້​ແລກ​ປ່ຽນ​ບົດ​ຮຽນກ່ຽວກັບວຽກຄົ້ນຄວ້າ ໃນອົງການ, ຂະແໜງການຂອງຕົນ ກັບ ວິທະຍາກອນ ຢ່າງກົງໄປກົງມາ, ເຮັດໃຫ້ນັກສຳມະນາກອນ ມີຄວາມເຂົ້າໃຈໃນວຽກຄົ້ນຄວ້າ ກໍຄືໂຄງຮ່າງການຄົ້ນຄວ້າ ໄດ້ເປັນລະບົບຫຼາຍຂຶ້ນ. ນອກຈາກນັ້ນ, ວິທະຍາກອນ ໄດ້ຊຸກຍູ້ໃຫ້ນັກສຳມະນາກອນ ສືບຕໍ່ຂຽນບົດຄົ້ນຄວ້າຕ່າງໆ ເພື່ອເຜີຍແຜ່ໃນເວັບໄຊຂອງສູນສົ່ງເສີມວາລະສານວິທະຍາສາດ ເພື່ອເປັນຖານຂໍ້ມູນທີ່ດີ ຮັບໃຊ້ສັງຄົມໃຫ້ຫຼາຍຂຶ້ນ. ໃນມື້ສຸດທ້າຍຂອງຊຸດຝຶກອົບຮົມ,  ນັກສຳມະນາກອນ ໄດ້ມີການນຳສະເໜີບົດຄົ້ນຄວ້າ 04 ບົດ ຊຶ່ງ ວິທະຍາກອນ ໄດ້ປະກອບຄຳເຫັນ ເພື່ອປັບປຸງບັນດາບົດຄົ້ນຄວ້າດັ່ງກ່າວ ໃຫ້ສາມາດພິມເຜີຍແຜ່ໄດ້ ໃນອະນາຄົດ. ໂດຍລວມເຫັນວ່າ ຊຸດຝຶກອົບຮົມຄັ້ງນີ້ ດຳເນີນໄປ ດ້ວຍຜົນສຳເລັດຢ່າງຈົບງາມ ເພາະນອກຈາກ ຈະໄດ້ຮັບຄວາມຮູ້ ຄວາມເຂົ້າໃຈ ໃນວຽກງານຄົ້ນຄວ້າແລ້ວ, ຍັງເປັນໂອກາດທີ່ດີ ໃຫ້ ນັກສຳມະນາກອນ ແລະ ວິທະຍາກອນ ​ໄດ້​ຮັດ​ແໜ້ນຄວາມສາມັກຄີ, ສ້າງກົນ​ໄກ​ປະ​ສານ​ງານ​ ລະ​ຫວ່າງ ຄ​ຕ​ພ​ ກັບບັນດາພາກສ່ວນທີ່ເຂົ້າຮ່ວມ ໃຫ້ວ່ອງໄວທັນການກວ່າເກົ່າ.

       ພາຍຫຼັງ​ສຳ​ເລັດ​ຊຸດ​ຝຶກ​ອົບ​ຮົມ, ທ່ານ ບຸນຍາເດດ ໄຊຍະວົງ, ກຳມະການຄະນະພັກ, ຫົວໜ້າກົມຄົ້ນຄວ້າ ແລະ ພົວພັນຫຼາຍຝ່າຍ ໄດ້ມອບ​ໃບ​ຢັ້ງ​ຢືນ​ໃຫ້​ບັນ​ດາ ນັກ​ສຳ​ມະ​ນາ​ກອນ ແລະ ວິທະຍາກອນ ເພື່ອເປັນການຢັ້ງຢືນຜົນສຳເລັດການເຂົ້າຮ່ວມຊຸດຝຶກອົບຮົມດັ່ງກ່າວ.

---