ຫົວໜ້າຄະນະພົວພັນຕ່າງປະເທດສູນກາງພັກ ຕ້ອນຮັບການເຂົ້າຢ້ຽມຂໍ່ານັບ ຂອງ ເອກອັກຄະລັດຖະທູດຟິລິບປິນ ປະຈຳ ສປປ ລາວ

ເຜີຍ​ແຜ່​ໂດຍ​: moderator ເວ​ລາ: 19/05/2026 08:56:07 ຈຳ​ນວນ​​ຢ້ຽມ​ຊົມ 94 ຄັ້ງ ​

 

     ໃນ​​​ວັນ​ທີ 18 ພຶດສະພາ 2026, ທີ່ ຄະນະ​ພົວພັນ​ຕ່າງປະ​ເທດ​ສູນ​ກາ​ງພັກ, ທ່ານ ບຸນເຫຼືອ ພັນດານຸວົງ, ກໍາມະການສູນກາງພັກ, ຫົວໜ້າ​ຄະນະ​ພົວພັນ​ຕ່າງປະ​ເທດ​ສູນ​ກາງ​ພັກ ​ໄດ້​ຕ້ອນຮັບການ​ເຂົ້າ​ຢ້ຽມຂໍ່ານັບ​ ຂອງ ທ່ານ ນາງ ອີລີສະເບດ ຕັນ ເຕ, ເອກອັກຄະລັດຖະທູດວິສາມັນຜູ້ມີອໍານາດເຕັມ ແຫ່ງ ສາທາລະນະລັດ ຟິລິບປິນ ປະຈໍາ ສປປ ລາວ ຄົນໃໝ່.

     ໃນໂອກາດດັ່ງກ່າວ, ທ່ານ ບຸນເຫຼືອ ພັນດານຸວົງ ໄດ້ສະ​ແດງ​ຄວາມຍິນດີຕ້ອນຮັບ ແລະ ​ຊົມ​ເຊີຍ ຕໍ່ ທ່ານເອກອັກຄະລັດຖະທູດ ທີ່​ໄດ້​ຮັບການແຕ່ງຕັ້ງໃຫ້ມາປະຕິບັດໜ້າທີ່ວຽກງານການທູດ ຢູ່ ສປປ ລາວ, ​ເຊື່ອ​ໝັ້ນ​ວ່າ ດ້ວຍບົດຮຽນ ແລະ ປະສົບການອັນອຸດົມສົມບູນຂອງ ທ່ານ​ເອກ​ອັກ​​ຄະລັດຖະທູດ ຈະ​ສືບ​​ຕໍ່ຊຸກຍູ້ ສາຍພົວພັນມິດຕະພາບ ແລະ ການພົວພັນ ລະຫວ່າງ 2 ປະເທດ ລາວ-ຟິລິບປິນ ໃຫ້ໄດ້ຮັບການເສີມຂະຫຍາຍ ແລະ ມີບາດກ້າວໃໝ່, ຊົມເຊີຍ ຕໍ່ຜົນສໍາເລັດໃນການເປັນເຈົ້າພາບກອງປະຊຸມສຸດຍອດອາຊຽນ ຄັ້ງທີ 48 ຂອງຟິລິບປິນ. ພ້ອມນັ້ນ, ທ່ານ ບຸນເຫຼືອ ພັນດານຸວົງ ຍັງໄດ້ແຈ້ງໃຫ້ຊາບພາລະບົດບາດ ຂອງ ຄະນະພົວພັນຕ່າງປະເທດສູນກາງພັກ ແລະ ການພົວພັນດ້ານພັກ ຂອງລາວ ກັບພັກການເມືອງຕ່າງປະເທດໃນໂລກ ໃນປະຈຸບັນ.  

     ທ່ານເອກອັກຄະລັດຖະທູດ ​ໄດ້ສະ​ແດງ​ຄວາມຂອບໃຈ ​ເປັນ​ຢ່າງ​ສູງ ທີ່​ໄດ້​ມີ​ໂອ​ກາດ​ເຂົ້າ​ຢ້ຽມ​ຂ່ຳ​ນັບ ແລະ  ຊົມເຊີຍ ​ທ່ານຫົວໜ້າຄະນະພົວພັນຕ່າງປະເທດສູນກາງພັກ ທີ່ໄດ້ຮັບການເລືອກຕັ້ງເປັນ ກໍາມະການສູນກາງພັກ ໃນກອງປະຊຸມໃຫຍ່ຜູ້ແທນທົ່ວປະເທດ ຄັ້ງທີ XII ຂອງ ພັກ ປປ ລາວ ທີ່ຜ່ານມາ, ພ້ອມທັງຢືນຢັນ ແລະ ໃຫ້ຄໍາໝັ້ນສັນຍາຈະ​ເຮັດ​ສຸດ​ຄວາມ​ສາ​ມາດຂອງ​ຕົນ ໃນ​ການ​​ເສີມຂະຫຍາຍສາຍພົວພັນມິດຕະພາບ ລະຫວ່າງ ຟິລິບປິນ-ລາວ ໃຫ້​​ນັບ​ມື້ແຕກດອກອອກ​ຜົນຍິ່​ງໆ​ຂຶ້ນ.

     ສອງຝ່າຍໄດ້ຕີລາຄາສູງ ຕໍ່ສາຍພົວພັນມິດຕະພາບ ແລະ ການຮ່ວມມື ລາວ-ຟິລິບປິນ ໃນດ້ານຕ່າງໆ, ໂດຍສະເພາະ ການຮ່ວມມືດ້ານເສດຖະກິດ, ການຄ້າ, ການລົງທຶນ, ການສ້າງຊັບພະຍາກອນມະນຸດ, ການທ່ອງທ່ຽວ ແລະ ອື່ນໆ ພ້ອມທັງຍິນດີປະສານສົມທົບຢ່າງແໜ້ນແຟ້ນ ເພື່ອຮ່ວມກັນຊຸກຍູ້ເສີມຂະຫຍາຍສາຍພົວພັນດັ່ງກ່າວໃຫ້ງອກງາມຍິ່ງໆຂຶ້ນ ເພື່ອນໍາເອົາຜົນປະໂຫຍດຕົວຈິງມາສູ່ປະຊາຊົນ ສອງຊາດ ລາວ-ຟິລິບປິນ, ປະກອບສ່ວນເຂົ້າໃນພາລະກິດສັນຕິພາບ, ມິດຕະພາບ ແລະ ການຮ່ວມມື ເພື່ອການພັດທະນາໃນພາກພື້ນ ແລະ ໃນໂລກ.

---