ຄະນະພົວພັນຕ່າງປະເທດສູນກາງພັກ, ຈັດກອງປະຊຸມສະຫຼຸບການເຄື່ອນໄຫວວຽກງານກວດກາ ແລະ ພິທີມອບ-ຮັບໃບຢັ້ງຢືນໜ່ວຍພັກປອດໃສ, ເຂັ້ມແຂງ, ໜັກແໜ້ນ ປະຈຳປີ 2025

ເຜີຍ​ແຜ່​ໂດຍ​: moderator ເວ​ລາ: 20/03/2026 16:39:27 ຈຳ​ນວນ​​ຢ້ຽມ​ຊົມ 37 ຄັ້ງ ​

      ໃນ​ວັນ​ທີ 20 ມີນາ 2026, ທີ່ ຄະ​ນະ​ພົວ​ພັນ​ຕ່າງ​ປະ​ເທດ​ສູນ​ກາງ​ພັກ ໄດ້ຈັດພິທີ ມອບ-ຮັບ​ ໃບຢັ້ງຢືນໜ່ວຍ​ພັກ​ປອດ​ໃສ, ເຂັ້ມ​ແຂງ, ໜັກ​ແໜ້ນ ໃຫ້ກຽດ​ເປັນ​ປະ​ທານ ​ໂດຍ​ ສະ​ຫາຍ ບຸນເຫຼືອ ພັນດານຸວົງ, ກຳມະການສູນກາງພັກ, ເລຂາຄະນະບໍລິຫານງານພັກ, ຫົວ​ໜ້າຄະນະພົວພັນຕ່າງປະເທດສູນກາງພັກ, ມີບັນດາຄະນະບໍລິຫານງານພັກ, ສະມາຊິກພັກທັງໝົດ ພາຍໃນ ຄະນະພົວພັນຕ່າງປະເທດສູນກາງພັກ ເຂົ້າ​ຮ່ວມ 62 ສະ​ຫາຍ, ຍິງ 19 ສະ​ຫາຍ.

      ຄະນະພົວພັນຕ່າງປະເທດສູນກາງພັກ ມີທັງໝົດ 6 ໜ່ວຍພັກ, ໃນພິທີ ໄດ້ຜ່ານບົດສະຫຼຸບຜົນການກວດກາພັກ-ລັດປົກກະຕິ ແລະ ແຜນການຮັກສານາມມະຍົດໜ່ວຍພັກປອດໃສ, ເຂັ້ມແຂງ, ໜັກແໜ້ນ ປະຈຳປີ 2025, ຫຼັງຈາກນັ້ນ ສະຫາຍ ວາລະໄຊ ເລັ່ງສະຫວັດ, ກຳມະການສຳຮອງສູນກາງພັກ, ຮອງເລຂາຄະນະພັກ, ປະທານກວດກາພັກ, ຮອງຫົວໜ້າ ຄຕພ ໄດ້ໃຫ້ກຽດຜ່ານມະຕິຮັບຮອງໜ່ວຍພັກປອດໃສ, ເຂັ້ມແຂງ, ໜັກແໜ້ນ ປະຈຳປີ 2025;

      ໃນພິທີດັ່ງກ່າວ, ສະຫາຍ ບຸນເຫຼືອ ພັນດານຸວົງ, ກຳມະການສູນກາງພັກ, ເລຂາຄະນະພັກ ຫົວ​ໜ້າ​ຄະນະພົວພັນຕ່າງປະເທດສູນກາງພັກ ໄດ້ໃຫ້ກຽດມອບໃບຢັ້ງຢືນໜ່ວຍພັກປອດໃສ, ເຂັ້ມແຂງ, ໜັກແໜ້ນ ປະຈຳປີ 2025 ໃຫ້ແກ່ 5 ໜ່ວຍພັກ ພ້ອມທັງໃຫ້ກຽດໂອ້ລົມຕໍ່ທີ່ປະຊຸມ ໂດຍສະແດງຄວາມຊົມເຊີຍຕໍ່ຜົນສຳເລັດຂອງ 05 ໜ່ວຍພັກ ທີ່ໄດ້ມີຄວາມພະຍາມ ແລະ ເຊີດຊູຄວາມຮັບຜິດຊອບສູງ ໃນການຮັກສານາມມະຍົດໜ່ວຍພັກປອດໃສ, ເຂັ້ມແຂງ, ໜັກແໜ້ນ ປະຈຳປີ 2025 ແລະ  ເຊື່ອໝັ້ນວ່າ ບັນດາໜ່ວຍພັກດັ່ງກ່າວຈະສືບຕໍ່ນຳພາໜ່ວຍພັກຂອງຕົນໃຫ້ຮັກສານາມມະຍົດໜ່ວຍພັກປອດໃສ, ເຂັ້ມແຂງ, ໜັກແໜ້ນໃນປີຕໍ່ໄປ, ສຳລັບໜ່ວຍພັກ ທີ່ເປັນໜ່ວຍພັກແຂງໃນປີນີ້ ກໍ່ສາມາດບຸກບືນເພື່ອສ້າງເປັນໜ່ວຍພັກປອດໃສ, ເຂັ້ມແຂງ, ໜັກແໜ້ນ ໃນປີ 2026, ໂດຍພາຍໃຕ້ການນຳພາ-ຊີ້ນຳ ຂອງສະຫາຍເລຂາໜ່ວຍພັກ ແລະ ການເຄື່ອນໄຫວຢ່າງຫ້າວຫັນດ້ວຍຄວາມຮັບຜິດຊອບສູງ ຂອງສະມາຊິກພາຍໃນໜ່ວຍ ຈົ່ງສືບຕໍ່ບົດບາດເປັນແບບຢ່າງນຳໜ້າພາທາງ, ມີສະຕິຕໍ່ການຈັດຕັ້ງຢືນຢູ່ແຖວໜ້າຂອງທຸກຂະບວນການ, ເພື່ອຈັດຕັ້ງປະຕິບັດມະຕິກອງປະຊຸມໃຫຍ່ຂອງອົງຄະນະພັກຄັ້ງທີ III ແລະ ພ້ອມກັນປະຕິບັດຕາມມະຕິຂອງກອງປະຊຸມໃຫຍ່ ຄັ້ງທີ XII ຂອງພັກ ຢ່າງເຂັ້ມງວດ.

---