ຫົວໜ້າຄະນະພົວພັນຕ່າງປະເທດ ຂອງສອງພັກ ລາວ-ຈີນ ພົບປະ ແລະ ລົງນາມ ແຜນການຮ່ວມມືສອງພັກ

ເຜີຍ​ແຜ່​ໂດຍ​: moderator ເວ​ລາ: 15/01/2026 10:54:57 ຈຳ​ນວນ​​ຢ້ຽມ​ຊົມ 133 ຄັ້ງ ​

     ໂດຍປະຕິບັດຕາມ ສັນຍາຮ່ວມມື ລະຫວ່າງ 2 ຄະນະພົວພັນຕ່າງປະເທດສູນກາງພັກ ລາວ-ຈີນ ສະບັບປີ 2023-2027, ໃນວັນທີ 13 ມັງກອນ 2026 ທີ່ ສໍານັກງານ ຄະນະພົວພັນຕ່າງປະເທດສູນກາງພັກ, ສະຫາຍ ບຸນເຫຼືອ ພັນດານຸວົງ, ກໍາມະການສູນກາງພັກ, ຫົວໜ້າຄະນະພົວພັນຕ່າງປະເທດສູນກາງພັກ ປປ ລາວ ໄດ້ພົບປະເຮັດວຽກກັບ ສະຫາຍ ຫຼິວ ຫາຍຊິງ, ກຳມະການສູນກາງພັກ, ຫົວໜ້າຄະນະພົວພັນຕ່າງປະເທດສູນກາງພັກກອມມູນິດຈີນ, ຜູ້ຕາງໜ້າພິເສດ ຂອງ ສະຫາຍ ສີ ຈິ້ນຜິງ, ເລຂາທິການໃຫຍ່ ພັກກອມມູນິດຈີນ ມາ​ຊົມເຊີຍຜົນສໍາເລັດ ກອງປະຊຸມໃຫຍ່ຜູ້ແທນທົ່ວປະເທດ ຄັ້ງທີ XII ຂອງ ພັກ ປປ ລາວ.

     ສອງຝ່າຍ ໄດ້ແລກປ່ຽນຄໍາຄິດເຫັນ ແລະ ຕີລາຄາສູງຕໍ່ຜົນສຳເລັດຂອງການຮ່ວມມື ລະຫວ່າງ ສອງຄະນະພົວພັນຕ່າງປະເທດສູນກາງພັກ ໃນການເຮັດບົດບາດເປັນເສນາທິການ ໃນການຕິດຕາມຊຸກຍູ້ການຈັດຕັ້ງປະຕິບັດແຜນການຮ່ວມມື 2 ພັກ ໄລຍະສົກປີ 2021-2025 ແລະ ສະແດງຄວາມເປັນເອກະພາບກັນ ສືບຕໍ່ຮ່ວມມືກັນໃນການເປັນໃຈກາງຊຸກຍູ້ການຈັດຕັ້ງປະຕິບັດ ແຜນແມ່ບົດວ່າດ້ວຍການສ້າງຄູ່ຮ່ວມຊາຕາກໍາ ລາວ-ຈີນ ກໍຄື ການຈັດຕັ້ງປະຕິບັດຄໍາເຫັນຊີ້ນໍາ ແລະ ການຕົກລົງ ລະຫວ່າງ ການນໍາສູງສຸດ ສອງພັກ, ສອງລັດ ລາວ-ຈີນ ໃນການເພີ່ມພູນຄູນສ້າງສາຍພົວພັນມິດຕະພາບອັນເປັນມູນເຊື້ອ ແລະ ການສ້າງຄູ່ຮ່ວມຊາຕາກໍາ ລາວ-ຈີນ ໃຫ້ມີມາດຕະຖານສູງ, ຄຸນນະພາບສູງ ແລະ ລະດັບສູງກວ່າເກົ່າ.

     ໃນໂອກາດພົບປະຄັ້ງນີ້, ສະຫາຍ ບຸນເຫຼືອ ພັນດານຸວົງ ໄດ້ຕາງໜ້າໃຫ້ ພັກປະຊາຊົນປະຕິວັດລາວ ແລະ ສະຫາຍ ຫຼິວ ຫາຍຊິງ ໄດ້ຕາງໜ້າໃຫ້ ພັກກອມມູນິດຈີນ ຮ່ວມລົງນາມ ແຜນການຮ່ວມມືລະຫວ່າງສອງພັກ ສະບັບ   ໃໝ່ ໄຍລະປີ 2026-2030, ເຊິ່ງແຜນການຮ່ວມມືດັ່ງກ່າວ ໄດ້ເປັນບ່ອນອີງສໍາຄັນໃນການພົວພົວພັນຮ່ວມມື ລະຫວ່າງ 2 ສູນກາງພັກ, ບັນດາອົງການອ້ອມຂ້າງສູນກາງພັກ ແລະ ການຮ່ວມມືບໍາລຸງສ້າງພະນັກງານ ລະຫວ່າງ ສອງພັກ ລາວ-ຈີນ ໃນໄລຍະ 5 ປີຕໍ່ໜ້າ.

---