ສະມາຄົມ ລາວ-ໄທ ແລະ ໄທ-ລາວ ເພື່ອມິດຕະພາບ ຈັດກອງປະຊຸມຮ່ວມປະຈໍາປີ ແລະ ທອດຖວາຍຜ້າກະຖິນພຣະຣາຊະທານຂອງເຈົ້າຊີວິດແຫ່ງຣາຊະອານາຈັກໄທ ທີ່ແຂວງສະຫວັນນະເຂດ

ເຜີຍ​ແຜ່​ໂດຍ​: moderator ເວ​ລາ: 20/10/2025 15:38:13 ຈຳ​ນວນ​​ຢ້ຽມ​ຊົມ 40 ຄັ້ງ ​

     ວັນທີ 18 ຕຸລາ 2025, ທີ່ແຂວງສະຫວັນນະເຂດ ສະມາຄົມ ລາວ-ໄທ ເພື່ອມິດຕະພາບ ແລະ ສະມາຄົມ ໄທ-ລາວ ເພື່ອມິດຕະພາບ ໄດ້ຈັດກອງປະຊຸມຮ່ວມປະຈໍາປີ ໂດຍການເປັນປະທານຮ່ວມຂອງທ່ານ ຫຼີີ ບຸນຄໍ້າ, ປະທານສະມາຄົມລາວ-ໄທ ເພື່ອມິດຕະພາບ ແລະ ທ່ານ ກຽດຕິຄຸນ ຊາດປະເສີດ, ປະທານສະມາຄົມ ໄທ-ລາວ ເພື່ອມິດຕະພາບ. ໃຫ້ກຽດເຂົ້າຮ່ວມເປັນແຂກກິຕິມະສັກ ຂອງ ທ່ານ ໂພໄຊ ໄຂຄໍາພິທູນ, ຮອງເຈົ້າແຂວງ ແຂວງສະຫວັນນະເຂດ. ພ້ອມນັ້ນຍັງມີ ຄະນະບໍລິຫານງານສະມາຄົມ ລາວ-ໄທ ແລະ ໄທ-ລາວ ເພື່ອມິດຕະພາບ ແລະ ແຂກທີ່ມີກຽດຈາກພາກສ່ວນກ່ຽວຂ້ອງຂອງສອງຝ່າຍເຂົ້າຮ່ວມ. ກອງປະຊຸມ ໄດ້ທົບທວນຄືນການພົວພັນຮ່ວມມື ແລະ ເຄື່ອນໄຫວສ້າງກິດຈະກໍາຮ່ວມກັນໃນໄລຍະຜ່ານມາ ແລະ ປຶກສາຫາລືແຜນການຮ່ວມມື ແລະ ເຄື່ອນໄຫວກິດຈະກໍາຮ່ວມກັນໃນຕໍ່ໜ້າ ເພື່ອເຮັດໃຫ້ການເຄື່ອນໄຫວຮ່ວມມື ຂອງສອງສະມາຄົມພວກເຮົາ ໃຫ້ນັບມື້ມີບາດກ້າວໃໝ່, ມີປະສິທິພາບ ແລະ ປະສິດທິຜົນ ເພື່ອປະກອບສ່ວນເຂົ້າໃນການເສີມຂະຫຍາຍ ແລະ ພັດທະນາສາຍພົວພັນ ແລະ ການຮ່ວມມື ຖານບ້ານໃຫ້ເຮືອນຄຽງກໍ່ຄືການເປັນຄູ່ຮ່ວມຍຸດທະສາດເພື່ອການຈະເລີນເຕີບໂຕ ແລະ ການພັດທະນາແບບຍືນຍົງ ລະຫວ່າງ ສອງປະເທດ ແລະ ປະຊາຊົນສອງຊາດ ລາວ  ແລະ ໄທ. ກອງປະຊຸມ ມີຄວາມພາກພູໃຈ ທີ່ເຫັນວ່າສະມາຄົມລາວ-ໄທ ເພື່ອມິດຕະພາບ ແລະ ສະມາຄົມ ໄທ-ລາວ ເພື່ອມິດຕະພາບ ໄດ້ຮັບການສ້າງຕັ້ງຂຶ້ນໃນ ວັນທີ 29 ມິຖຸນາ  1993 ເຊິ່ງມາຮອດປີນີ້ແມ່ນຄົບຮອບ 32 ປີ, ຕະຫລອດໄລຍະເວລາ 32 ປີ ທີ່ຜ່ານມາ ການຮ່ວມມື ຂອງສອງສະມາຄົມໄດ້ດໍາເນີນໄປດ້ວຍບັນຍາກາດໄມຕີຈິດມິດຕະພາບທີ່ດີ ແລະ ມີການພັດທະນາຢ່າງຕໍ່ເນື່ອງໃນຫຼາຍດ້ານທັງພາກລັດ, ພາກເອກະຊົນ ຫມາຍວ່າໄດ້ເຮັດຫນ້າທີ່ວຽກງານການທູດປະຊາຊົນໄດ້ດີ, ເຊິ່ງເຫັນວ່າ ລັດຖະບານ ແລະ ປະຊາຊົນຂອງທັງສອງປະເທດມີຄວາມເຂົ້າອົກເຂົ້າໃຈກັນດີ, ເຊິ່ງສອງສະມາຄົມໄດ້ຈັດກິດຈະກຳ ຮ່ວມກັນຢ່າງຕໍ່ເນື່ອງ ເຊັ່ນ: ການທອດຖວາຍຜ້າກະຖິນພຣະຣາຊະທານຢູ່ລາວ ຈຳນວນ 24 ຄັ້ງ ແລະ ການທອດຖວາຍ ຜ້າປ່າສາມັກຄີ ຢູ່ໄທ ຈໍານວນ 04 ຄັ້ງ. ພ້ອມນັ້ນ, ໃນກອງປະຊຸມ ຍັງໄດ້ປຶກສາຫາລື, ຄົ້ນຄວ້າປະກອບ ຄໍາຄິດຄໍາເຫັນຕໍ່ການເຄື່ອນໄຫວ ແລະ ຈັດກິດຈະກໍາຮ່ວມກັນ ເພື່ອສົ່ງເສີມການຮ່ວມມືທາງດ້ານການທ່ອງທ່ຽວ, ກະສິກໍາ, ການຝຶກອົບຮົມວິຊາການຂະແໜງຕ່າງໆ, ການຮ່ວມມືພາກທຸລະກິດ,  ການແລກປ່ຽນບົດຮຽນລະຫວ່າງບ້ານ-ຊຸມຊົນ, ການສ້າງກິດຈະກຳກິລາຫາລາຍໄດ້ຊ່ວຍເຫຼືອສັງຄົມ ແລະ ອື່ນໆ ເພື່ອເຮັດໃຫ້ ສະມາຄົມມີການເຄື່ອນໄຫວທີ່ຫຼາກຫຼາຍ ແລະ ມີຄວາມພົ້ນເດັ່ນຂຶ້ນ.

      ໃນວັນທີ 19 ຕຸລາ 2025 ສະມາຄົມ ລາວ-ໄທ ເພື່ອມິດຕະພາບ ແລະ ສະມາຄົມ ໄທ-ລາວ ເພື່ອມິດຕະພາບ ໄດ້ຮ່ວມກັນນໍາເອົາກອງຜ້າກະຖິນພຣະຣາຊະທານຂອງເຈົ້າຊິວິດແຫ່ງຣາຊະອານາຈັກໄທ ໄປທອດຖວາຍ ຢູ່ວັດສຸນ​ັນ​ທາ​ຣາມ, ​ນະ​ຄອນ​ໄກ​ສອນ​ພົມ​ວິ​ຫານ, ແຂວງ​ສະ​ຫວັນ​ນະ​ເຂດ. ໃຫ້ກຽດຮັບກອງກະຖິນໂດຍ ພຣະອາຈານ ວົງ​ສິນ ຣັດ​ຕະ​ນະ​ພອນ, ເຈົ້າ​ອະ​ທິ​ການ​ວັດ ສຸ​ນັນ​ທາ​ຣາມ. ໃຫ້ກຽດເຂົ້າຮ່ວມໃນພິທີດັ່ງກ່າວ ຝ່າຍລາວມີ ທ່ານ ບຸນ​ໂຈມ ອຸ​ບົນ​ປະ​ເສີດ, ກໍາມະການສູນກາງພັກ, ເຈົ້າແຂວງ​ສະ​ຫວັນ​ນະ​ເຂດ, ທ່ານ ດຣ. ນາງ ອິນລາວັນ ແກ້ວບຸນພັນ, ກໍາມະການສູນກາງພັກ, ຮອງປະທານສູນກາງແນວລາວສ້າງຊາດ, ທ່ານ ໂພໄຊ ໄຂຄໍາພິທູນ,ຮອງເຈົ້າແຂວງສະຫວັນນະເຂດ, ທ່ານ ນາງ ຟອງສະໝຸດ ອັ່ນລາວັນ,ຮອງລັດຖະມົນຕີກະຊວງຕ່າງປະເທດ,  ທ່ານ ຫຼີ ບຸນຄໍ້າ, ປະທານສະມາຄົມ ລາວ-ໄທ ເພື່ອມິດຕະພາບ, ທ່ານ ຄຳພັນ ອັ່ນລາວັນ, ເອກອັກຄະລັດຖະທູດວິສາມັັັັັັັັັັັັັັັັັັັັັັັັັັັັັັນຜູ້ມີອໍານາດເຕັມແຫ່ງ ສປປ ລາວ ປະຈໍາ ຣາຊະອານາຈັກໄທ, ທ່ານ ທ່ານ ສົມສັກ ວິໄລທອນ, ກົງສູນໃຫຍ່ແຫ່ງ ສປປ ລາວ ປະຈໍາຂອນແກ່ນ, ພ​ຣະ​ອາ​ຈານໃຫຍ່ ດາວເຮືອງ ຄຳປະເສີດ, ຮອງຫົວໜ້າຫ້ອງການ​​ສູນ​ກາງ​ອົງ​ການ​ພ​ຣະ​ພຸດ​ທະ​ສາ​ສຳ​ພັນ ແຫ່ງ ສ​ປ​ປ ລາວ. ພ້ອມນັ້ນຍັງມີ ອາດີດປະທານ ແລະ ຄະນະບໍລິຫານງານສະມາຄົມ ລາວ-ໄທ ເພື່ອມິດຕະພາບ.  ສ່ວນຝ່າຍໄທ ນຳໂດຍ ທ່ານ ກຽດຕິຄຸນ ຊາດປະເສີດ, ປະທານສະມາຄົມ ໄທ-ລາວ ເພື່ອມິດຕະພາບ, ທ່ານ ນາງ ຈິຣັດຍາ ພີຣານົນ, ອຸປະທູດສະຖານເອກອັກຄະຣາຊະທູດແຫ່ງຣາຊະອານາຈັກໄທ ປະຈຳ ສປປ ລາວ, ທ່ານ ປັດ ປັດທໍາມະຈິດ, ກົງສຸນໃຫຍ່ແຫ່ງຣາຊະອານາຈັກໄທ ປະຈໍາ ແຂວງສະຫວັນນະເຂດ ແລະ ຄະນະບໍລິຫານງານສະມາຄົມໄທ-ລາວ ເພື່ອມິດຕະພາບ. ນອກນັ້ນ, ມີບັນດາທ່ານຈາກ​ອົງການຈັດຕັ້ງທີ່ກ່ຽວຂ້ອງຈາກສູນກາງ ແລະ ອ້ອມຂ້າງແຂວງສະຫວັນນະເຂດ ແລະ ພໍ່ແມ່ປະຊາຊົນຜູ້ມີຈິດໃຈເຫຼື້ອມໃສໃນພຸດທະສາສະໜາທັງລາວ ແລະ ໄທ ເຂົ້າຮ່ວມ.

     ການຈັດກິດຈະກໍາທອດຖະກິນ ແລະ ທອດຜ້າປ່າສາມັກຄີ ແມ່ນກິດຈະກຳປະຈໍາປີ ຂອງສອງສະມາຄົມ ລາວ-ໄທ ແລະ ໄທ-ລາວ ເພື່ອມິດຕະພາບ ທີ່ເຄີຍປະຕິບັດຮ່ວມກັນເປັນປົກກະຕິ, ເຊິ່ງຄັ້ງນີ້ ເປັນການທອດຖວາຍກະຖິນພຣະຣາຊະທານຂອງເຈົ້າຊິວິດແຫ່ງຣາຊະອານາຈັກໄທ ແມ່ນຄັ້ງທີ່ 25 (ຜ້າກະຖິນຂອງເຈົ້າຊິວິດແຫ່ງຣາຊະອານາຈັກໄທ ຣາຊະການທີ IX ​ຈຳ​ນວນ 19 ຄັ້ງ ແລະ ຣາຊະການທີ X ຈໍານວນ 6 ຄັ້ງ). ກິດຈະກໍາທອດກະຖິນ ແລະ ທອດຜ້າປ່າ ແມ່ນເພື່ອສົ່ງເສີມ ແລະ ອະນຸລັກວັດທະນະທຳ, ຮີດຄອງປະເພນີອັນດີງາມ ຂອງ ປະຊາຊົນລາວ ແລະ ໄທ ເປັນການສົ່ງເສີມໃຫ້ມີການໄປມາຫາສູ່ເຊິ່ງກັນ ແລະ ກັນ ຂອງປະຊາຊົນລາວ ແລະ ໄທ, ທັງເປັນການປະກອບສ່ວນສຳຄັນເຂົ້າໃນການເສີມຂະຫຍາຍສາຍພົວພັນມິດຕະພາບ ແລະ ການຮ່ວມມືທີ່ມີມູນເຊື້ອ​ອັນດີງາມ ລະຫວ່າງ ສອງປະເທດ ແລະ ປະຊາຊົນສອງຊາດລາວ ແລະ ໄທ. ລວມປັດໃຈການທອດກະຖີນໃນຄັ້ງນີ້ໄດ້ 325,700,000 ກີບ 1,262,200 ບາດ, 220 ໂດລ່າ, ເຊິ່ງປັດໃຈດັ່ງກ່າວ  ຈະໄດ້ນໍາໄປບູລະນະ ແລະ ປະຕິສັງຂອນວັດ ລວມມີ ສ້າງກຸຕິ 1 ຫຼັງ ແລະ ຫໍພະ 2 ຫຼັງ ແລະ ອື່ນໆ.  ນອກຈາກການບູລະນະ ແລະ ປະຕິສັງຂອນວັດ ແລ້ວ ຝ່າຍໄທ ຍັງ ໄດ້ຊ່ວຍສ້າງຫ້ອງເກັບ ແລະ ຕິດຕັ້ງເຄື່ອງກອງນ້ຳດື່ມມູນຄ່າ 234.500.000 ກີບ (350.000 ບາດ) ໃຫ້ແກ່ໂຮງຮຽນມັດທະຍົມຊົນເຜົ່າກິນນອນເມືອງເຊໂປນ, ແຂວງສະຫວັນນະເຂດ ແລະ ໄດ້ມອບຜ້າຫົ່ມ 500 ຜືນ ໃຫ້ແກ່ແຂວງສະຫວັນນະເຂດ ເພື່ອແຈກຢາຍໃຫ້ປະຊາຊົນຕາມຄວາມເໝາະສົມ.

---