ພິທີປາຖະ ກະຖາເນື່ອງໃນໂອກາດວັນສະຖາປະນາ ສາທາລະນະລັດ ປະຊາຊົນ ປະຊາທິປະໄຕ ເກົາຫຼີ ຄົບຮອບ 77 ປີ (9/9/1948 - 9/9/2025). ທີ່ແຂວງບໍລິຄໍາໄຊ

ເຜີຍ​ແຜ່​ໂດຍ​: moderator ເວ​ລາ: 09/09/2025 08:39:43 ຈຳ​ນວນ​​ຢ້ຽມ​ຊົມ 38 ຄັ້ງ ​

    ໃນ​ຕອນ​ເຊົ້າ​​ວັນ​ທີ 05 ກັນຍາ 2025 ທີ່ ແຂວງບໍລິຄໍາໄຊ, ສະມາຄົມມິດຕະພາບລາວ - ສປປ ເກົາຫຼີ ແລະ ອົງການປົກຄອງແຂວງບໍລິຄໍາໄຊ ຮ່ວມກັບສະຖານເອກອັກຄະລັດຖະທູດແຫ່ງ ສປປ ເກົາຫຼີ ປະຈໍາ ສປປ ລາວ ໄດ້​ຈັດພິທີປາຖະ ກະຖາເນື່ອງໃນໂອກາດວັນສະຖາປະນາ ສາທາລະນະລັດ ປະຊາຊົນ ປະຊາທິປະໄຕ ເກົາຫຼີ ຄົບຮອບ 77 ປີ (9/9/1948 - 9/9/2025).  

     ໃຫ້ກຽດເຂົ້າ​ຮ່ວມໃນພິທີ​ປາ​ຖະ​ກະ​ຖາໃນ​ຄັ້ງ​ນີ້​ມີ: ສະຫາຍ ​ປອ. ສອນທະນູ ທໍາມະວົງ, ກໍາມະການສູນກາງພັກ, ເລຂາພັກແຂວງ, ປະ​ທານ​ກຳ​ມະ​ການ​ປົກ​ຄອງແຂວງບໍລິຄໍາໄຊ; ສະຫາຍ ນາງ ວິ​ລະ​ວອນ ພັນ​ທະ​ວົງ, ​​ຮອງ​ຫົວ​ໜ້າ​ຄະ​ນະ​ໂຄ​ສະ​ນາ​ອົບ​ຮົມ​ສູນ​ກາງ​ພັກ, ຮອງ​ປະ​ທານ​ສະ​ມາ​ຄົມປະທານສະມາຄົມມິດຕະພາບ ລາວ - ສປປ ເກົາຫຼີ; ສະຫາຍ ລີ ຢົງ ຊົນ, ເອກອັກຄະລັດຖະທູດວິສາມັນຜູ້ມີອຳນາດເຕັມແຫ່ງ ສປປ ເກົາຫຼີ ປະຈຳ ສປປ ລາວ; ພ້ອມດ້ວຍພະນັກງານທີ່ມາຈາກພາກສ່ວນກ່ຽວຂ້ອງ ທັງ ສປປ ເກົາຫຼີ ແລະ ລາວ ຈໍານວນປະມານ 400 ກວ່າຄົນເຂົ້າຮ່ວມ.

     ໃນ​ໂອ​ກາດນີ້ ສະຫາຍ ລີ ຢົງ ຊົນ, ເອກອັກຄະລັດຖະທູດວິສາມັນຜູ້ມີອຳນາດເຕັມ ແຫ່ງ ສປປ ເກົາຫຼີ ປະຈຳ ສປປ ລາວ ໄດ້​​ຂຶ້ນກ່າວປາຖະກະຖາ ເຊິ່ງເນື້ອໃນເວົ້າເຖິງຜົນງານຂອງພັກແຮງງານເກົາຫຼີ, ລັດຖະບານ ແລະ ປະຊາຊົນ ສປປ ເກົາຫຼີ ພາຍໃຕ້ການຊີ້ນໍາໆພາຂອງ ສະຫາຍ ກິມ ອິນ ຊຸງ, ຜູ້ນໍາທີ່ຍິ່ງໃຫຍ່, ປະທານປະເທດຕະຫຼອດການ ແຫ່ງ  ສປປ ເກົາຫຼີ ແລະ ຜູ້ນຳພາແສງສະຫວ່າງແນວຄິດຈຸດເຊ່ ໃນພາລະກິດປະຕິວັດຂອງພັກ, ກໍາລັງປະກອບອາວຸດ ແລະ ປະຊາຊົນ ສປປ ເກົາຫຼີ ໃນຂະບວນວິວັດແຫ່ງການຕໍ່ສູ້ປົດປ່ອຍຊາດກໍ່ຄືປົກປັກຮັກສາ ແລະ ສ້າງສາພັດທະນາປະເທດຊາດ ສປປ ເກົາຫຼີ ແລະ ສະຫາຍ ກິມ ເຈີງ ອິນ, ຜູ້ນໍາທີ່ຍິ່ງໃຫຍ່, ເລຂາທິການໃຫຍ່ພັກແຮງງານເກົາຫຼີຕະຫຼອດການ, ປະທານຄະນະກໍາມະທິການປ້ອງກັນຊາດແຫ່ງ ສປປ ເກົາຫຼີ ຕະຫຼອດການ; ໃນປະຈຸບັນພາຍໃຕ້ການນໍາພາຂອງ ສະຫາຍ ກິມ ເຈີງ ອຸນ, ຜູ້ນໍາທີ່ເຄົາລົບຮັກ, ເລຂາທິການໃຫຍ່ພັກແຮງງານເກົາຫຼີ, ປະທານກິດຈະການແຫ່ງລັດແຫ່ງ ສປປ ເກົາຫຼີ, ຜູ້ບັນຊາການສູງສຸດກໍາລັງປະກອບອາວຸດແຫ່ງ ສປປ ເກົາຫຼີ ເຮັດໃຫ້ ສປປ ເກົາຫຼີ ນັບ​ມື້ມີການພັດທະນາ, ການເມືອງມີສະຖຽນລະພາບໜັກແໜ້ນ, ວຽກງານປ້ອງກັນຊາດປ້ອງກັນຄວາມສະຫງົບມີຄວາມເຂັ້ມແຂງ, ທັນສະໄໝ, ເສດຖະກິດມີການພັດທະນາ, ຊີວິດການເປັນຢູ່ຂອງປະຊາຊົນ ສປປ ເກົາຫຼີ ໄດ້ຮັບການປັບປຸງດີຂື້ນເທື່ອລະກ້າວ ແລະ ເຮັດໃຫ້ຜູ້ເຂົ້າຮ່ວມໄດ້ຮັບຮູ້ເຖິງສະພາບການຕົວຈິງ ໃນ ການພັດທະນາກໍ່ຄືຜົນສໍາເລັດອັນໃຫຍ່ຫຼວງທີ່ປະຊາຊົນ ສປປ ເກົາຫຼີ ຍາດມາໄດ້. ພ້ອມດຽວກັນນີ້ ສະຫາຍເອກອັກຄະລັດຖະທູດ ກໍ່ຍັງໄດ້ຍົກໃຫ້ເຫັນເຖິງສາຍພົວພັນມິດຕະພາບ ແລະ ການຮ່ວມມືອັນເປັນມູນເຊື້ອ ລະຫວ່າງ ສອງພັກ, ສອງລັດ ແລະ ປະຊາຊົນສອງຊາດລາວ ແລະ ສປປ ເກົາຫຼີ ໃນໄລຍະຜ່ານມາ ແລະ ປັດ​ຈຸ​ບັນ.

     ພາຍຫຼັງ ທີ່ ສະຫາຍ ເອກອັກຄະລັດຖະທູດວິສາມັນຜູ້ມີອຳນາດເຕັມ ແຫ່ງ ສປປ ເກົາຫຼີ ປະຈຳ ສປປ ລາວ ສໍາເລັດກ່າວປາຖະກະຖາ, ສະຫາຍ ສອນ​ທະ​ນູ ທຳ​ມະ​ວົງ, ກຳ​ມະ​ການ​ສູນ​ກາງ​ພັກ, ເລ​ຂາ​ພັກ​ແຂວງ ກໍ່ໄດ້ກ່າວສະແດງຄວາມຂອບໃຈແລະ ມອບກະຕ່າດອກໄມ້ອວຍພອນ ແລະ ເຊື່ອ​ໝັ້ນ​ວ່າ ພາຍ​ໃຕ້​ການ​ນຳ​ພາ​ອັນ​ຖືກ​ຕ້ອງ, ເດັດດ່ຽວ, ເຂັ້ມແຂງ ຂອງ​ພັກ​ແຮງ​ງານ​ເກົາ​ຫຼີ, ອັນ​ມີ ສະ​ຫາຍ ກິມ ເຈິງ ອຸນ, ຜູ້ນໍາທີ່ເຄົາລົບຮັກ, ເລຂາທິການໃຫຍ່ພັກແຮງງານເກົາຫຼີ, ປະທານກິດຈະການແຫ່ງລັດ ແຫ່ງ ສປປ ເກົາຫຼີ, ຜູ້ບັນຊາການສູງສຸດກໍາລັງປະກອບອາວຸດແຫ່ງ ສປປ ເກົາຫຼີນັ້ນ, ປະ​ຊາ​ຊົນ ສ​ປ​ປ ເກົາ​ຫຼີ ອ້າຍ​ນ້ອງ ​ຈະ​ສືບ​ຕໍ່​ຍາດ​ໄດ້​ຜົນ​ສຳ​ເລັດ​ໃໝ່ໃຫຍ່​ຫຼວງກວ່າ​ເກົ່າ ໃນ​ພາ​ລະ​ກິດ​ປົກປັກຮັກສາສ້າງ​ສາ​ປະ​ເທດຕາມຈຸດໝາຍ ທີ່ວາງໄວ້. ໃນ​ໂອ​ກາດ​ດັ່ງ​ກ່າວ, ສະ​ຫາຍ ນາງ ວິ​ລະ​ວອນ ພັນ​ທະ​ວົງ, ຮອງ​ຫົວ​ໜ້​າ​ຄະ​ນະ​ໂຄ​ສະ​ນາ​ອົບ​ຮົບ​ສູນ​ກາງ​ພັກ, ຮອງ​ປະ​ທານ​ສະ​ມາ​ຄົມມິດ​ຕະ​ພາບ​ລາວ - ສ​ປ​ປ ເກົາຫຼີ​ ຕາງ​ໜ້າ​ຄະ​ນະ​ບໍ​ລິ​ຫານ​ງານ​ສະ​ມາ​ຄົມ​ມິດ​ຕະ​ພາບ​ລາວ - ສ​ປ​ປ ເກົາຫຼີ ມອບ​ຄອມ​ພິວ​ເຕີ​ໂນດ​ບຸກ ຈຳ​ນວນ 02 ເຄື່ອງ​ໃຫ້​ແກ່​ແຂວງ​ບໍ​ລິ​ຄຳ​ໄຊ.

    ໃນພິ​ທີດັ່ງກ່າວຍັງໄດ້​ມີ​ການວາງ​ສະ​ແດງ​ຮູບ​ພ​າບ, ສາຍ​ວີ​ດີ​ໂອ ແລະ ສະແດງສີລະປະ ເຮັດໃຫ້ພິທີດັ່ງກ່າວມີຄວາມ ໝາຍ ແລະ ມີບັນຍາກາດເບີກບານມ່ວນຊື່ນ.

---