ຄະນະຜູ້ແທນສະມາຄົມແລກປ່ຽນສາກົນແຫ່ງ ສປ ຈີນ ຢ້ຽມຢາມ ແລະ ເຮັດວຽກ ຢູ່ ສປປ ລາວ

ເຜີຍ​ແຜ່​ໂດຍ​: moderator ເວ​ລາ: 10/04/2025 15:18:32 ຈຳ​ນວນ​​ຢ້ຽມ​ຊົມ 178 ຄັ້ງ ​

       ໂດຍຕອບສະໜອງຕາມຄໍາເຊີນ ຂອງ ສະຫາຍ ສົມມາດ ພົລເສນາ, ກຳມະການສູນກາງພັກ, ​ຮອງປະ ທານສະພາແຫ່ງຊາດ, ປະທານ​ຄະນະສັນຕິພາບ ແລະ ສາມັກຄີ ຂອງລາວ; ຄະນະຜູ້ແທນສະມາຄົມແລກປ່ຽນສາກົນ ແຫ່ງປະເທດຈີນ ນໍາໂດຍ ສະຫາຍ ລີວ ຫົງ ສາຍ, ຮອງປະທານສະມາຄົມແລກປ່ຽນສາກົນແຫ່ງປະເທດຈີນ ເດີນທາງ ມາຢ້ຽມຢາມ ແລະ ເຮັດວຽກ ຢູ່ ສປປ ລາວ ແຕ່ວັນທີ 06 - 09 ເມສາ 2025.

        ໃນວັນທີ 07 ເມສາ 2025, ໄດ້ມີກອງປະຊຸມພົບປະແລກປ່ຽນ ລະຫວ່າງ ຄະນະສັນຕິພາບ ແລະ ສາມັກຄີ ຂອງລາວ ແລະ ສະມາຄົມແລກປ່ຽນສາກົນແຫ່ງປະເທດຈີນ. ຝ່າຍລາວ ນໍາໂດຍ ສະຫາຍ ສົມມາດ ພົລເສນາ, ກໍາມະການສູນກາງພັກ, ຮອງປະທານສະພາແຫ່ງຊາດ, ປະທານຄະນະສັນຕິພາບ ແລະ ສາມັກຄີ ຂອງລາວ; ຝ່າຍຈີນ ນໍາໂດຍ ສະຫາຍ ລີວ ຫົງ ສາຍ, ຮອງປະທານສະມາຄົມແລກປ່ຽນສາກົນແຫ່ງປະເທດຈີນ. ໃນກອງປະຊຸມ ສອງຝ່າຍ ໄດ້ແລກປ່ຽນພາລະບົດບາດ ແລະ ການເຄື່ອນໄຫວ ຂອງ ແຕ່ລະອົງການໃຫ້ ກັນຊາບ ແລະ ປຶກສາຫາລືເພື່ອສ້າງ ກົນໄກປະສານງານ, ກົນໄກການພົວພັນຮ່ວມມືໃນຕໍ່ໜ້າ ເພື່ອເຄື່ອນໄຫວ ແລະ ສ້າງກິດຈະກໍາຮ່ວມກັນ.

        ສອງຝ່າຍ ຍັງໄດ້ຕີລາຄາສູງ ແລະ ຍິນດີ ທີ່ສາຍ​ພົວ​ພັນ​ມິດ​ຕະ​ພາບ​ອັນ​ເປັນ​ມູນ​ເຊື້ອ ແລະ ການຮ່ວມ​ມື​ແບບ​ຄູ່​ຮ່ວມ​ຍຸດ​ທະ​ສາດ​ຮອບ​ດ້ານ ​ໝັ້ນ​ຄົງ​ຍາວ​ນານ ຕາມ​ທິດສີ່​ດີ ແລະ ​ການ​ເປັນ​ຄູ່​ຮ່ວມ​ຊາ​ຕາ​ກຳ​ສັງ​ຄົມ​ນິ​ຍົມ ລະຫວ່າງ ສອງພັກ, ສອງລັດ ແລະ ປະຊາຊົນສອງຊາດ ລາວ ແລະ ຈີນ ຍັງສືບຕໍ່ໄດ້ຮັບການເສີມຂະຫຍາຍ ແລະ ເພີ່ມພູນຄູນສ້າງ ໃຫ້ນັບມື້ພັດທະນາ ແລະ ກ້າວເຂົ້າສູ່ລວງເລິກ.

      ນອກຈາກພົບປະເຮັດວຽກ, ຢູ່ນະຄອນຫຼວງວຽງຈັນ ຄະນະຜູ້ແທນ ສະມາຄົມເພື່ອການແລກປ່ຽນສາກົນແຫ່ງ ສປ ຈີນ ຍັງໄດ້ໄປເຂົ້າຮ່ວມພິທີວາງສີລາເລີກໂຄງການກໍ່ສ້າງອາຄານໂຮງຮຽນປະຖົມບ້ານກົກງີ້ວ, ເມືອງຈອມເພັດ, ແຂວງຫຼວງພະບາງ ເຊິ່ງເປັນ 1 ໃນ ໂຮງຮຽນ 22 ຫຼັງທີ່ສ້າງຂຶ້ນໂດຍການຊ່ວຍເຫຼືອພາຍໃຕ້ການຮ່ວມມື ແລະ ຊີ້ນໍາ ຂອງ ສອງອົງການດັ່ງກ່າວ.

 

---