ພິທີປາຖະກະຖາເລົ່າມູນເຊື້ອວັນສ້າງຕັ້ງພັກແຮງງານເກົາຫຼີ ຄົບຮອບ 78 ປີ (10/10/1945 – 10/10/2023)

ເຜີຍ​ແຜ່​ໂດຍ​: editor ເວ​ລາ: 18/01/2024 14:11:57 ຈຳ​ນວນ​​ຢ້ຽມ​ຊົມ 1125 ຄັ້ງ ​

ວັນທີ 06 ຕຸລາ 2023 ທີ່ກະຊວງປ້ອງກັນປະເທດ, ກະຊວງປ້ອງກັນປະເທດ ແລະ ສະມາຄົມມິດຕະພາບ ລາວ - ສປປ ເກົາຫຼີ ຮ່ວມກັບສະຖານເອກອັກຄະລັດຖະທູດແຫ່ງ ສປປ ເກົາຫຼີ ປະຈໍາ ສປປ ລາວ ໄດ້ຈັດພິທີປາຖະກະຖາເລົ່າມູນເຊື້ອວັນສ້າງຕັ້ງພັກແຮງງານເກົາຫຼີ ຄົບຮອບ 78 ປີ (10/10/1945 – 10/10/2023). ໃຫ້ກຽດເຂົ້າຮ່ວມພິທີດັ່ງກ່າວ ມີ ສະຫາຍ ນາງ ວິລະວອນ ພັນທະວົງ, ຮອງຫົວໜ້າຄະນະໂຄສະນາອົບຮົມສູນກາງພັກ, ຮອງປະທານສະມາຄົມມິດຕະພາບ ລາວ - ສປປ ເກົາຫຼີ; ສະຫາຍ ວາລະໄຊ ເລັ່ງສະຫວັດ, ຮອງຫົວໜ້າຄະນະພົວພັນ ຕ່າງປະເທດສູນກາງພັກ, ສະຫາຍ ລີ ຢົງ ຊົນ, ເອກອັກຄະລັດຖະທູດວິສາມັນຜູ້ມີອໍານາດເຕັມແຫ່ງ ສປປ ເກົາຫຼີ ປະຈໍາ ສປປ ລາວ; ພົນຕີ ສາຍໃຈ ກົມມະສິດ, ຫົວໜ້າຫ້ອງວ່າການກະຊວງປ້ອງກັນປະເທດ; ນອກນັ້ນ, ຍັງມີ ການນໍາ, ນາຍພົນທະຫານ ແລະ ພະນັກງານຫຼັກແຫຼ່ງຂອງກະຊວງປ້ອງກັນປະເທດ ແລະ ຜູ້ເຂົ້າຮ່ວມຈາກພາກສ່ວນກ່ຽວຂ້ອງທັງ ສປປ ເກົາຫຼີ ແລະ ລາວ ຈໍານວນ 300 ກວ່າຄົນ. ສະຫາຍ ລີ ຢົງ ຊົນ, ເອກອັກຄະລັດຖະທູດວິສາມັນຜູ້ມີອໍານາດເຕັມແຫ່ງ ສປປ ເກົາຫຼີ ປະຈໍາ ສປປ ລາວ ໃຫ້ກຽດຂຶ້ນເລົ່າມູນເຊື້ອເຊິ່ງໄດ້ຍົກໃຫ້ເຫັນເຖິງບົດບາດການນໍາພາຂອງພັກແຮງງານເກົາຫຼີ ໃນໄລຍະຕໍ່ສູ້ກູ້ຊາດອັນມີສະຫາຍ ກິມອິນຊຸງ, ສະຫາຍ ກິມເຈິງອິນ ຜູ້ນໍາທີ່ຍິ່ງໃຫຍ່ ແລະ ສະຫາຍ ກິມ ເຈິງອຸນ, ຜູ້ນໍາທີ່ເຄົາລົບຮັກ, ເລຂາທິ ການໃຫຍ່ພັກແຮງງານເກົາຫຼີ, ປະທານກິດຈະການແຫ່ງລັດແຫ່ງ ສປປ ເກົາຫຼີ, ຜູ້ບັນຊາການສູງສຸດກໍາລັງປະກອບອາວຸດແຫ່ງ ສປປ ເກົາຫຼີ ຜູ້ສືບທອດພາລະກິດ ປົກປັກຮັກສາ ແລະ ສ້າງສາພັດທະນາປະເທດຊາດ ເຮັດໃຫ້ ສປປ ເກົາຫຼີ ມີສະຖຽນລະພາບໜັກແໜ້ນ, ວຽກງານປ້ອງກັນຊາດປ້ອງກັນຄວາມສະຫງົບມີຄວາມເຂັ້ມແຂງ ແລະ ທັນສະໄໝ, ເສດຖະກິດມີການພັດທະນາ, ຊີວິດການເປັນຢູ່ຂອງປະຊາຊົນ ສປປ ເກົາຫຼີໄດ້ຮັບການປັບປຸງດີຂືຶ້ນເລື້ອຍໆ. ພ້ອມດຽວກັນນີ້ ຍັງໄດ້ຕີລາຄາສາຍພົວພັນມິດຕະພາບອັນເປັນມູນເຊື້ອ ແລະ ການຮ່ວມມືລະຫວ່າງສອງພັກ, ສອງລັດ ແລະ ປະຊາຊົນ ສອງຊາດລາວ ແລະ ສປປ ເກົາຫຼີ ຍັງສືບຕໍ່ໄດ້ຮັບການເສີມຂະຫຍາຍ ແລະ ເພີ່ມພູນຄູນສ້າງ, ປະກອບສ່ວນເຂົ້າໃນພະລາກິດເສີມສ້າງສັນຕິພາບ, ມິດຕະ ພາບ ແລະ ການຮ່ວມມືໃນຂົງເຂດ ແລະ ໃນໂລກ. ນອກຈາກຮັບຟັງປາຖະກະຖາ ຜູ້ເຂົ້າຮ່ວມຍັງໄດ້ຊົມການວາງສະແດງຮູບພາບ, ສາຍວີດີໂອ, ສະແດງສິລະປະຂອງ ສປປ ເກົາຫຼີ ແລະ ສິລະປະກອນກອງທັບປະຊາຊົນລາວ ເຮັດໃຫ້ພິທີມີເນື້ອໃນເລິກເຊິ່ງ ແລະ ມີບັນຍາກາດຄຶກຄື້ນ.

---