ພະນັກງານ ຄະນະພົວພັນຕ່າງປະເທດສູນກາງພັກ ໄປຢ້ຽມຊົມຫໍພິພິທະພັນ ກອງທັບປະຊາຊົນລາວ

ເຜີຍ​ແຜ່​ໂດຍ​: editor ເວ​ລາ: 17/01/2024 14:00:52 ຈຳ​ນວນ​​ຢ້ຽມ​ຊົມ 1356 ຄັ້ງ ​

ໃນຕອນເຊົ້າ ຂອງວັນທີ 17 ມັງກອນ 2024, ພະນັກງານ ຄະນະພົວພັນຕ່າງປະເທດສູນກາງພັກ ກໍຄື 3 ອົງການຈັດຕັ້ງມະຫາຊົນ ຄຕພ (ຊາວໜຸ່ມ, ກໍາມະບານ ແລະ ແມ່ຍິງ) ນໍາໂດຍ ສະຫາຍ ວົງຄໍາ ແສນສະທິດ, ຮອງຫົວໜ້າກົມການທູດປະຊາຊົນ, ຮັກສາການເລຂາຄະນະບໍລິຫານງານຊາວໜຸ່ມ ຄະນະພົວພັນຕ່າງປະເທດສູນກາງພັກ ໄດ້ເຂົ້າຢ້ຽມຊົມຫໍພິພິທະພັນກອງທັບປະຊາຊົນລາວ ເພື່ອສ້າງຂະບວນການຂ່ຳນັບຮັບຕ້ອນວັນສໍາຄັນຕ່າງໆຂອງຊາດ ເວົ້າລວມເວົ້າສະເພາະ ກໍຄື ວັນຄ້າຍວັນເກີດ ທ່ານ ຄໍາໄຕ ສີພັນດອນ, ອະດີດປະທານພັກ, ອະດີດປະທານປະເທດ ແຫ່ງ ສປປ ລາວ ຄົບຮອບ 100 ປີ (08/02/1924-08/02/2024) ແລະ ວັນສ້າງຕັ້ງກອງທັບປະຊາຊົນລາວ ຄົບຮອບ 75 ປີ (20/01/1949-20/01/2024) ທີ່ຈະມາເຖິງນີ້ ໃຫ້ເຕັມໄປດ້ວຍຄວາມໝາຍ, ຄວາມສໍາຄັນ ແລະ ເປັນຂະບວນການຢ່າງຟົດຟື້ນ ແລະ ກວ້າງຂວາງ, ທັງເປັນການຫວນຄືນມູນເຊື້ອການເຄື່ອນໄຫວປະຕິວັດຂອງ ບັນດາຜູ້ນໍາການປະຕິວັດ, ວິລະກໍາອັນໂດດເດັ່ນ ແລະ ຄວາມເດັດດ່ຽວບໍ່ຍອມຈໍານົນຂອງບັນດາອະດີດທ່ານຜູ້ນໍາ ໃນຂະບວນການປະຕິວັດຊາດ ຕ້ານຈັກກະພັດລ່າເມືອງຂຶ້ນທັງແບບເກົ່າ ແລະ ແບບໃໝ່. ໃນການຢ້ຽມຊົມຜູ້ເຂົ້າຮ່ວມໄດ້ຮັບຟັງການບັນລະຍາຍກ່ຽວກັບວິລະກໍາການຕໍ່ສູ້ກູ້ຊາດຂອງການນໍາພັກ-ລັດ, ປະຫວັດການເຕີບໃຫ່ຍຂະຫຍາຍຕົວຂອງກອງທັບປະຊາຊົນລາວ ເຊິ່ງໄດ້ເຮັດໃຫ້ຜູ້ເຂົ້າຮ່ວມ ໄດ້ຮັບຮູ້ແຈ້ງ ແລະ ເຂົ້າໃຈເລິກເຊິ່ງກວ່າເກົ່າຕໍ່ເຫດການໃນການຕໍ່ສູ້ທີ່ສໍາຄັນທາງດ້ານການເມືອງ ແລະ ການທະຫານ ໃນແຕ່ລະໄລຍະ ທັງເປັນການຮຽນຮູ້, ປຸກຈິດສໍານຶກ, ຍົກສູງສະຕິຕໍ່ຊາດ ແລະ ການສຶກສາອົບຮົມການເມືອງແນວຄິດໃຫ້ພະນັກງານ ຄະນະພົວພັນຕ່າງປະເທດສູນກາງພັກ ໄດ້ຮັບຮູ້ເຖິງປະຫວັດອັນພິລະອາດຫານ ແລະ ເຊື່ອມຊຶມບົດຮຽນທາງປະຫວັດສາດ ຮັກບ້ານເກີດເມືອງນອນ ແລະ ນໍາເອົາບົດຮຽນທາງປະຫວັດສາດ ມາໝູນໃຊ້ເຂົ້າໃນໜ້າວຽກງານການເມືອງຕົວຈິງຂອງຕົນ ໃຫ້ມີຜົນສໍາເລັດ.

---