ພິທີເປີດການແຂ່ງຂັນກິລາບານເຕະຍິງ-ຊາຍ ມິດຕະພາບ ເພື່ອຂໍ່ານັບຮັບຕ້ອນວັນສ້າງຕັ້ງ ຄະນະພົວພັນຕ່າງປະເທດສູນກາງພັກ ຄົບຮອບ 40 ປີ

ເຜີຍ​ແຜ່​ໂດຍ​: editor ເວ​ລາ: 20/06/2023 14:52:53 ຈຳ​ນວນ​​ຢ້ຽມ​ຊົມ 790 ຄັ້ງ ​

     ໃນຕອນບ່າຍວັນທີ 16 ມິຖຸນາ 2023, ຄະນະພົວພັນຕ່າງປະເທດສູນກາງພັກ ໄດ້ຈັດພິທີເປີດການແຂ່ງຂັນກິລາບານເຕະຍິງ-ຊາຍ ມິດຕະພາບ ເພື່ອເປັນການສ້າງຂະບວນການຂ່ຳນັບຮັບຕ້ອນວັນສ້າງຕັ້ງ ຄະນະພົວພັນຕ່າງປະເທດສູນກາງພັກ ຄົບຮອບ 40 ປີ (29/06/1983-29/06/2023) ໂດຍການເປັນປະທານຂອງ ສະຫາຍ ວາລະໄຊ ເລັ່ງສະຫວັດ, ກຳມະການຄະນະພັກ, ຮອງຫົວໜ້າຄະນະພົວພັນຕ່າງປະເທດສູນກາງພັກ. ການແຂ່ງຂັນກິລາບານເຕະຍິງ-ຊາຍ ໃນຄັ້ງນີ້, ມີການເຂົ້າຮ່ວມ ຈາກ 4 ພາກສ່ວນ ຄື: ຄະນະພົວພັນຕ່າງປະເທດສູນກາງພັກ, ຫ້ອງວ່າການສູນກາງພັກ, ຄະນະຈັດຕັ້ງສູນກາງພັກ ແລະ ກະຊວງການຕ່າງປະເທດ.

     ໃນພິທີດັ່ງກ່າວ, ສະຫາຍ ວາລະໄຊ ເລັ່ງສະຫວັດ, ຮອງຫົວໜ້າຄະນະພົວພັນຕ່າງປະເທດສູນກາງພັກ ໄດ້ກ່າວຄຳເຫັນເປີດພິທີ ແລະ ໄດ້ຍົກໃຫ້ເຫັນເຖິງປະຫວັດຄວາມເປັນມາໃນການສ້າງຕັ້ງຄະນະພົວພັນຕ່າງປະເທດສູນກາງພັກ ນັບແຕ່ປີ 1983 ເປັນຕົ້ນມາ, ຍົກໃຫ້ເຫັນເຖິງຂະບວນວິວັດແຫ່ງການເຕີບໃຫຍ່ຂະຫຍາຍຕົວ ຂອງຄະນະພົວພັນຕ່າງປະເທດສູນກາງພັກ,​ ພາລະບົດບາດຂອງຄະນະພົວພັນການຕ່າງປະເທດສູນກາງພັກ ໃນການປະຕິບັດໜ້າທີ່ວຽກງານການຕ່າງປະເທດຂອງພັກ ແລະ ການທູດປະຊາຊົນ ຕະຫຼອດໄລຍະ 40 ປີ ຜ່ານມາ; ຍົກໃຫ້ເຫັນ ການພົວພັນຕ່າງປະເທດ ຂອງພັກ ປປ ລາວ ນັບມື້ໄດ້ເປີດກວ້າງ, ມີການພົວພັນກັບບັນດາພັກອ້າຍນ້ອງປະເທດສັງຄົມນິຍົມ, ບັນດາພັກກອມມູນິດ, ພັກກຳມະກອນ, ພັກການເມືອງກ້າວໜ້າ ແລະ ບັນດາພັກກຳອຳນາດໃນປະເທດຕ່າງໆ. ມາເຖິງປັດຈຸບັນ, ພັກ ປປ ລາວ ໄດ້ມີການພົວພັນດ້ານພັກ ກັບ 140 ພັກການເມືອງ ຈາກ 83 ປະເທດໃນທົ່ວໂລກ ແລະ ມີການພົວພັນການທູດດ້ານສະມາຄົມມິດຕະພາບລາວກັບຕ່າງປະເທດ ຈຳນວນ 19 ສະມາຄົມ ແລະ ຄະນະສັນຕິພາບ, ສາມັກຄີກັບນານາຊາດຂອງລາວ.

    ຜ່ານການແຂ່ງຂັນທີມໄດ້ຮັບໄຊຊະນະເລີດບານເຕະຊາຍ ແມ່ນທີມຄະນະຈັດຕັ້ງສູນກາງພັກ ແລະ ທີມທີ່ໄດ້ໄຊຊະນະເລີດບານເຕະຍິງ ແມ່ນທີມຫ້ອງວ່າການສູນກາງພັກ

     ງານແຂ່ງຂັນກິລາໃນຄັ້ງນີ້, ໄດ້ດຳເນີນໄປດ້ວຍບັນຍາກາດທີ່ມ່ວນຊື່ນ ແລະ ມີໄມຕີຈິດມິດຕະພາບລະຫວ່າງພະນັກງານ, ລັດຖະກອນ ຂອງ 4 ອົງການ, ເປັນການປະກອບສ່ວນ ຮັດແໜ້ນຄວາມສາມັກຄີ ແລະ ທັງເປັນຂະບວນການຟົດຟື້ນ ເພື່ອຂ່ຳນັບຮັບຕ້ອນວັນສ້າງຕັ້ງ ຄຕພ ຄົບຮອບ 40 ປີອີກດ້ວຍ.

---