ຄະນະພົວພັນຕ່າງປະເທດສູນກາງພັກ ຈັດກອງປະຊຸມສ້າງແຜນກໍານົດ ພະນັກງານນໍາພາ-ຄຸ້ມຄອງ ຂັ້ນສູນກາງຄຸ້ມຄອງ

ເຜີຍ​ແຜ່​ໂດຍ​: editor ເວ​ລາ: 24/10/2022 16:01:06 ຈຳ​ນວນ​​ຢ້ຽມ​ຊົມ 778 ຄັ້ງ ​

    ໃນລະຫວ່າງວັນທີ 24-25/10/2022, ຄະນະພົວພັນຕ່າງປະເທດສູນກາງພັກ (ຄຕພ) ໄດ້ຈັດກອງປະຊຸມສ້າງແຜນກໍານົດພະນັກງານນໍາພາ-ຄຸ້ມຄອງຂັ້ນສູນກາງຄຸ້ມຄອງ ໃຫ້ກຽດເປັນປະທານໂດຍ ສະຫາຍ ທອງສະຫວັນ ພົມວິຫານ, ກຳມະການສູນກາງພັກ, ເລຂາຄະນະບໍລິຫານງານພັກ, ຫົວໜ້າຄະນະພົວພັນຕ່າງປະ ເທດສູນກາງພັກ, ໂດຍມີສະຫາຍຜູ້ຕາງໜ້າຈາກ ຄະນະຈັດຕັ້ງສູນກາງພັກ, ບັນດາສະຫາຍໃນຄະນະພັກ-ຄະນະນໍາ, ອະດີດພະນັກງານການນໍາ ຄຕພ, ຄະນະກົມ, ຄະນະໜ່ວຍພັກ ເຂົ້າຮ່ວມຢ່າງພ້ອມພຽງ.   

   ໃນພິທີ, ສະຫາຍ ທອງສະຫວັນ ພົມວິຫານ, ກຳມະການສູນກາງພັກ, ເລຂາຄະນະບໍລິຫານງານພັກ, ຫົວໜ້າຄະນະພົວພັນຕ່າງປະເທດສູນກາງພັກ ໄດ້ມີຄໍາເຫັນຊີ້ນໍາກອງປະຊຸມສ້າງແຜນກໍານົດພະນັກງານນໍາພາ-ຄຸ້ມຄອງຂັ້ນສູນກາງຄຸ້ມຄອງ, ໂດຍໄດ້ເນັ້ນໜັກເຖິງຄວາມໝາຍ ແລະ ຄວາມສຳຄັນຂອງການສ້າງແຜນກໍານົດພະ ນັກງານນໍາພາ ເຊິ່ງເປັນວຽກງານພື້ນຖານທີ່ສໍາຄັນໃນການຫັນຍຸດທະສາດກ່ຽວກັບວຽກງານພະນັກງານ ເປັນອັນລະອຽດ, ທັງສອດຄ່ອງກັບລະບຽບການຂອງການສ້າງແຜນກໍ່ສ້າງ-ບໍາລຸງ, ຄາດຄະເນການສັບຊ້ອນ ແລະ ຈັດວາງພະນັກງານ ຂອງຄະນະພົວພັນຕ່າງປະເທດສູນກາງພັກ ແຕ່ປີ 2022-2025.  ກ່ອນເຂົ້າສູ່ການທາບທາມຕົວຈິງ, ສະຫາຍ ນາງ ພອນດາວັນ ພິນສະຫວັນ, ຫົວໜ້າກົມຈັດຕັ້ງ-ພະນັກງານ ໄດ້ຜ່ານບົດສະຫຼຸບການຈັດຕັ້ງປະຕິບັດວຽກງານສ້າງແຜນກໍານົດພະນັກງານນໍາພາ-ຄຸ້ມຄອງ ໃນໄລຍະ 2016-2020 ຜ່ານມາ;  ສະຫາຍ ສົມພອນ ສີຈະເລີນ, ຮອງເລຂາຄະນະພັກ ຄຕພ ໄດ້ເຜີຍແຜ່ມະຕິ ສະບັບເລກທີ 030 ແລະ 032/ກມສພ, ລົງວັນທີ 03/01/2018 ແລະ ຜູ້ຕາງໜ້າຈາກ ຄະນະຈັດຕັ້ງສູນກາງພັກ ໄດ້ສືບຕໍ່ເຜີຍແຜ່ຄໍາແນະນໍາ ຂອງຄະນະຈັດຕັ້ງສູນກາງພັກ ສະບັບເລກທີ 292/ຄຈສພ, ລົງວັນທີ 26/04/2018 ກ່ຽວກັບການຈັດຕັ້ງປະຕິບັດມະຕິຂອງກົມການເມືອງສູນກາງພັກ ສະບັບ ເລກທີ 30/ກມສພ ແລະ ສະບັບ ເລກທີ 032/ກມສພ, ລົງວັນທີ 03/01/2018.

   ຫຼັງຈາກນີ້, ກອງປະຊຸມໄດ້ ດໍາເນີນໄປຕາມຂັ້ນຕອນ, ດ້ວຍຄວາມຮັບຜິດຊອບສູງ ແລະ ບັນລຸຕາມລະດັບຄາດໝາຍ ທີ່ວາງໄວ້.

 

---