ຄະນະພົວພັນຕ່າງປະເທດສູນກາງພັກ ທາບທາມສ້າງແຜນກໍານົດພະນັກງານນຳພາ-ຄຸ້ມຄອງ

ເຜີຍ​ແຜ່​ໂດຍ​: editor ເວ​ລາ: 25/07/2022 15:54:27 ຈຳ​ນວນ​​ຢ້ຽມ​ຊົມ 868 ຄັ້ງ ​

       ໃນວັນທີ 06 ກໍລະກົດ 2022, ຄະນະພົວພັນຕ່າງປະເທດສູນກາງພັກ ໄດ້ຈັດກອງປະຊຸມທາບທາມ ເພື່ອສ້າງແຜນກໍານົດພະນັກງານນຳພາ-ຄຸ້ມຄອງ ຂັ້ນຄະນະພົວພັນຕ່າງປະເທດສູນກາງພັກ ຄຸ້ມຄອງ, ໂດຍການເປັນປະທານຂອງ ສະຫາຍ ທອງສະຫວັນ ພົມວິຫານ, ກໍາມະການສູນກາງພັກ, ເລຂາຄະນະບໍລິຫານງານພັກ, ຫົວໜ້າຄະນະພົວພັນຕ່າງປະເທດສູນກາງພັກ ໂດຍມີຄະນະພັກ, ຄະນະນຳ, ຄະນະກົມ, ຄະນະພະແນກ ແລະ ພະນັກງານວິຊາການທັງໝົດຂອງຄະນະພົວພັນຕ່າງປະເທດສູນກາງພັກ ເຂົ້າຮ່ວມ.

       ໃນໂອກາດດັ່ງກ່າວ, ສະຫາຍ ທອງສະຫວັນ ພົມວິຫານ ໄດ້ກ່າວເປີດກອງປະຊຸມ ແລະ ໄດ້ເນັ້ນໜັກເຖິງ ຄວາມໝາຍ, ຄວາມສໍາຄັນ ແລະ ຈຸດປະສົງຂອງວຽກງານສ້າງແຜນກຳນົດພະນັກງານນຳພາ-ຄຸ້ມຄອງ ເຊິ່ງເປັນວຽກງານໜຶ່ງທີ່ສໍາຄັນ, ເປັນພື້ນຖານຂອງວຽກງານພະນັກງານ ເພື່ອຕອບສະໜອງຄວາມຮຽກຮ້ອງຕ້ອງການຂອງ ໜ້າທີ່ການເມືອງ ໃນສະເພາະໜ້າ ແລະ ຍາວນານ, ເປັນການຫັນຍຸດທະສາດ ວຽກງານພະນັກງານໃຫ້ເປັນອັນລະອຽດ ໃນການສ້າງແຜນກໍ່ສ້າງ-ບຳລຸງ, ຄາດຄະເນສັບຊ້ອນ ແລະ ຈັດວາງ ພະນັກງານຢ່າງສົມເຫດສົມຜົນ, ທັງເປັນການຄາດຄະເນເປົ້າໝາຍ ພະນັກງານ ທີ່ຈະຈັດວາງເຂົ້າໃນຕຳແໜ່ງນຳພາ-ຄຸ້ມຄອງ ແຕ່ລະຂັ້ນ, ແນໃສ່ຮັບປະກັນລັກສະນະສືບທອດ ປ່ຽນແທນຕໍ່ເນື່ອງຢ່າງມີປະສິດທິພາບ.

       ສະຫາຍຫົວໜ້າຄະນະພົວພັນຕ່າງປະເທດສູນກາງພັກ ຍັງໄດ້ແນະນໍາ ໃຫ້ຜູ້ເຂົ້າຮ່ວມຕ້ອງໄດ້ຄົ້ນຄວ້າຢ່າງເລິກເຊິ່ງ ຕໍ່ກັບເປົ້າໝາຍເລືອກເຟັ້ນທີ່ຈະກຳນົດເຂົ້າໃສ່ແຕ່ລະຕຳແໜ່ງ, ຕ້ອງຄັດເລືອກໃຫ້ໄດ້ບຸກຄົນທີ່ພົ້ນເດັ່ນ ມີຄວາມຮູ້, ຄວາມສາມາດ, ຄຸນສົມບັດສິນທຳປະຕິວັດ, ຮູ້ຜັນຂະຫຍາຍແນວທາງຂອງພັກ, ນະໂຍບາຍຂອງລັດ ເຂົ້າໃນການນໍາພາປະຕິບັດໜ້າທີ່ວຽກງານ, ມີພາວະຄວາມເປັນຜູ້ນຳ ໃນການນຳພາພະນັກງານ-ລັດຖະກອນເຄື່ອນໄຫວວຽກງານຕ່າງໆ ທີ່ການຈັດຕັ້ງມອບໝາຍໃຫ້, ມີຄວາມສະດຸ້ງໄວຕໍ່ບັນຫາຕ່າງໆ, ແກ້ໄຂບັນຫາຕ່າງໆ ຢ່າງມີປະສິດທິຜົນ, ມີຄວາມດຸໝັ່ນ, ສັດຊື່, ປອດໃສ, ເປັນແບບຢ່າງໃນການດໍາລົງຊີວິດ, ບໍ່ສໍ້ລາດບັງຫລວງ ແລະ ເປັນເຈົ້າການໃນການເຕົ້າໂຮມຄວາມສາມັກຄີ, ເຮັດວຽກມີແບບແຜນ, ມີການຊຸກຍູ້ຕິດຕາມ, ກວດກາ, ສະຫຼຸບຕີລາ ຄາ, ຖອດຖອນບົດຮຽນ ແລະ ໃກ້ຊິດຕິດແທດ ກັບມະຫາຊົນຢ່າງແທ້ຈິງ. ທ່ານປະທານກອງປະຊຸມ ຍັງໄດ້ເໜັ້ນ ໜັກຕື່ມວ່າ ການທີ່ຈະສາມາດເລືອກໄດ້ບຸກຄົນ ຄືແນວນັ້ນ, ຕ້ອງຫຼີກລ່ຽງແນວຄິດອິດສາບັງບຽດ, ກຸ່ມກ້ອນ, ແນວຄິດພັກພວກ; ຕ້ອງກ້າສົ່ງເສີມບຸກຄົນທີ່ດີເດັ່ນ ແລະ ມີມາດຖານເງື່ອນໄຂຄົບຖ້ວນ ເຂົ້າໃນຕໍາແໜ່ງນໍາພາ-ຄຸ້ມຄອງ. ການສ້າງແຜນກຳນົດພະນັກງານ ຕ້ອງຮັບປະກັນລັກສະນະເປີດກວ້າງ, ມີຄວາມໂປ່ງໃສ, ພາວະວິໄສ, ຮອບດ້ານ, ຍຸຕິທຳ, ຕ້ອງຮັບປະກັນໂຄງປະກອບເພດ, ເຜົ່າ, ລັກສະນະສົມສ່ວນ ລະຫວ່າງພະນັກງານ ຮຸ່ນອາວຸໂສ, ຮຸ່ນກາງ, ຮຸ່ນໜຸ່ມ. ໃນນັ້ນ, ພະນັກງານຮຸ່ນໜຸ່ມໃຫ້ກວມອັດຕາສ່ວນຫລາຍກວ່າ ເພື່ອຮັບປະກັນລັກສະນະສືບທອດຕໍ່ເນື່ອງ. ໃນກອງປະຊຸມ ບັນດາຜູ້ເຂົ້າຮ່ວມໄດ້ໃຊ້ສິດ ປ່ອນບັດຄັດເລືອກເປົ້າໝາຍເຂົ້າໃນແຜນກຳນົດພະນັກງານນຳພາ-ຄຸ້ມຄອງ ດ້ວຍຄວາມຮັບຜິດຊອບສູງ.

---