ກອງປະຊຸມສະຫຼຸບການເຄື່ອນໄຫວວຽກງານ ປະຈຳປີ 2025 ແລະ ທິດທາງແຜນການ ປີ 2026 ຂອງ ຄະນະພົວພັນຕ່າງປະເທດສູນກາງພັກ

ເຜີຍ​ແຜ່​ໂດຍ​: moderator ເວ​ລາ: 30/01/2026 14:16:41 ຈຳ​ນວນ​​ຢ້ຽມ​ຊົມ 127 ຄັ້ງ ​

     ໃນຕອນເຊົ້າ​ວັນທີ 30 ມັງກອນ 2026, ​ຄະ​ນະ​ພົວ​ພັນ​ຕ່າງ​ປະ​ເທດ​ສູນ​ກາງ​ພັກ ໄດ້ຈັດກອງປະຊຸມສະຫຼຸບການເຄື່ອນໄຫວວຽກງານຂອງຕົນ ປະຈຳປີ 2025, ໂດຍການເປັນປະທານຂອງ ສະຫາຍ ບຸນເຫຼືອ ພັນດານຸວົງ, ກຳມະການສູນກາງພັກ, ເລຂາຄະນະບໍລິຫານງານພັກ, ຫົວໜ້າຄະນະພົວພັນຕ່າງປະເທດສູນກາງພັກ, ເຊິ່ງມີ ຄະ​ນະ​ພັກ-ຄະນະນໍາ, ຄະນະກົມ, ພະນັກງານອາວຸໂສບໍານານ, ຄະນະພະແນກ ແລະ ພະນັກງານຂອງ ຄຕພ ເຂົ້າຮ່ວມຢ່າງພ້ອມພຽງ.

     ກອງປະຊຸມໄດ້ຮັບ​ຟັງ​ການສະຫຼຸບຕີ​ລາ​ຄາຄືນການປະ​ຕິ​ບັດ​ວຽກ​ງານຂອງ ຄຕພ ໃນໄລຍະ 1 ປີ ຜ່ານ​ມາ, ໂດຍ​ໄດ້​ຍົກ​ໃຫ້​ເຫັນ​ຜົນ​ງານ​ທີ່​ຍາດ​ມາ​ໄດ້, ບາງດ້ານທີ່ຄົງຄ້າງ, ບົດຮຽນທີ່ຖອດຖອນໄດ້, ທິດທາງແຜນການ ແລະ ຄາດ​ໝາຍ​ສູ້​ຊົນ​ ສຳ​ລັບ​ປີ 2026.  ໃນໂອກາດນີ້, ສະຫາຍ ບຸນເຫຼືອ ພັນດານຸວົງ ໄດ້​ໃຫ້​ກຽດໂອ້​ລົ​ມ ແລະ ສະແດງຄວາມຊົມເຊີຍຕໍ່ ບັນດາຜົນສຳເລັດ ແລະ ຜົນ​ງານທີ່ພະນັກງານຄະນະພົວພັນຕ່າງປະເທດສູນກາງພັກ ຍາດມາໄດ້ຕະຫຼອດໄລຍະ 1 ປີ ຜ່ານມາ, ໂດຍສະເພາະການປະກອບ ສ່ວນຢ່າງຕັ້ງໜ້າເຂົ້າໃນວຽກງານ ແລະ ເຫດການສຳຄັນຂອງຊາດ ເປັນຕົ້ນແມ່ນ ການສະເຫລີມສະຫລອງ 3 ວັນປະຫວັດສາດ ຄື: ວັນສ້າງຕັ້ງພັກປະຊາຊົນປະຕິວັດລາວ ຄົບຮອບ 70 ປີ, ວັນສະຖາປະນາ ສປປ ລາວ ຄົບຮອບ 50 ປີ ແລະ ວັນເກີດ ປະທານ ໄກສອນ ພົມວິຫານ ຄົບຮອບ 105 ປີ. ພ້ອມດຽວກັນນີ້, ຍັງໄດ້ເປັນເຈົ້າການຄົ້ນຄວ້າສະເໜີຂັ້ນເທິງພິຈາລະນາຕົກລົງຂະຫຍາຍການຮ່ວມມືດ້ານພັກເພີ່ມຂຶ້ນຕື່ມ, ເຊິ່ງມາຮອດປັດຈຸບັນ ພັກປະຊາຊົນປະຕິວັດລາວ ມີສາຍພົວພັນກັບ 145 ພັກການເມືອງ ຈາກ 82 ປະເທດ, ມີສະມາຄົມມິດຕະພາບລາວກັບຕ່າງປະເທດ 20 ສະມາຄົມ ແລະ 1 ຄະນະສັນຕິພາບ ແລະ ສາມັກຄີຂອງລາວ, ນີ້ເປັນການສະແດງໃຫ້ເຫັນເຖິງການເຮັດ​ສຳ​ເລັດ​ພາ​ລະ​ບົດ​ບາດເປັນ​ເສ​ນາ​ທິ​ການ​ໃຫ້​ແກ່ ສູນ​ກາງ​ພັກ ໃນ​ການເຄື່ອນໄຫວຕ່າງປະເທດດ້ານພັກ ແລະ ການທູດປະຊາຊົນ ອັນ​ໄດ້​ເຮັດ​ໃຫ້ມີເພື່ອນມິດນັບມື້ນັບເພີ່ມຂຶ້ນ, ບົດ​ບາດ​​ຂອງ ​ພັກ-ລັດ​ເຮົາ ໄດ້​ຮັບ​ການ​ຍົກ​ສູງໃນ​ເວ​ທີ​ພາກ​ພື້ນ ແລະ ສາກົນ.

     ຫຼັງຈາກສຳເລັດວາລະກອງປະຊຸມດັ່ງກ່າວຂ້າງເທິງ, ກໍ່ໄດ້ມີການສືບຕໍ່ຈັດ ພິທີປະກາດພະນັກງານອອກພັກການ-ຮັບອຸດໜູນບຳນານ, ເລື່ອນຕຳແໜ່ງບໍລິຫານ ແລະ ມອບໃບຍ້ອງຍໍ ປະຈຳປີ 2025. ໂດຍ ສະຫາຍ ເກີລໍ່ ຢາງກໍ່, ຫົວໜ້າກົມຈັດຕັ້ງ-ພະນັກງານ ຂອງ ຄຕພ ໄດ້ຂຶ້ນຜ່ານ ຂໍ້ຕົກລົງ ວ່າດ້ວຍ ການອະນຸມັດໃຫ້ພະນັກງານອອກພັກຜ່ອນຮັບອຸດໜູນ-ບຳນານ ຈຳນວນ  3 ສະຫາຍ, ເລື່ອນຕຳແໜ່ງບໍລິຫານຂັ້ນຮອງຫົວໜ້າກົມ ຈຳນວນ 1 ສະຫາຍ ແລະ ມອບໃບຍ້ອງຍໍໃຫ້ພະນັກງານພາຍໃນ ຄຕພ ຜູ້ທີ່ມີຜົນງານດີເດັ່ນຈຳນວນໜຶ່ງ. ໃນໂອກາດນີ້, ສະຫາຍ ບຸນເຫຼືອ ພັນດານຸວົງ ໄດ້ຕີລາຄາສູງຕໍ່ບັນດາພະນັກງານທີ່ອອກພັກ ຜ່ອນຮັບອຸດໜູນ-ບຳນານ ເຊິ່ງໄດ້ສຳເລັດການເຮັດໜ້າທີ່ການເມືອງຂອງຕົນໄດ້ຢ່າງສົມບູນ, ພ້ອມທັງສະແດງຄວາມຊົມເຊີຍຕໍ່ພະ ນັກງານທີ່ໄດ້ຮັບການເລື່ອນຕຳແໜ່ງ ເຊິ່ງຖືເປັນການໄດ້ຮັບຄວາມໄວ້ເນື້ອເຊື່ອໃຈຢ່າງສູງຈາກຄະນະພັກ-ຄະນະນຳ ຄຕພ ໃຫ້ປະຕິບັດໜ້າທີ່ສຳຄັນ. ພ້ອມດຽວກັນນີ້, ກໍໄດ້ມີຄໍາເຫັນຊີ້ນໍາໃຫ້ພະນັກງານ-ສະມາຊິກພັກ ຂອງ ຄຕພ ສຸມໃສ່ການຈັດຕັ້ງຜັນຂະຫຍາຍມະຕິກອງປະຊຸມໃຫຍ່ຜູ້ແທນທົ່ວປະເທດ ຄັ້ງທີ XII ຂອງ ພັກ ປປ ລາວ, ມະຕິກອງປະຊຸມໃຫຍ່ສະມາຊິກພັກ ຄັ້ງທີ III ຂອງ ອົງຄະນະພັກ ຄຕພ, ແຜນພັດທະນາຂອງ ຄຕພ ແຕ່ປີ 2026-2030 ແລະ ຂໍ້ແຂ່ງຂັນຮັກຊາດ ແລະ ພັດທະນາ ໃຫ້ແຕກດອກອອກຜົນຍິ່ງໆຂຶ້ນ. ພ້ອມນີ້, ກໍໄດ້​ສະ​ແດງ​ຄວາມ​ເຊື່ອ​ໝັ້ນ​ວ່າ​ ດ້ວຍ​ຈິດ​ໃຈ​ມາ​ນະ​ບຸກບືນ, ຄວາມ​ສາ​ມັກ​ຄີ​ເປັ​ນ​ເອກ​ະ​ພາບ​ພາຍ​ໃນ ຈະ​ເຮັດ​ໃຫ້​ການ​ປະ​ຕິ​ບັດ​ໜ້າ​ທີ່​ ຂອງ ຄຕພ ​ສືບ​ຕໍ່​ຍາດ​ໄດ້​ຜົ​ນ​ສຳ​ເລັດໃໝ່ໃຫຍ່ຫຼວງກວ່າ​ເກົ່າ, ສືບ​ຕໍ່​ສ້າງ​ສະ​ພາບ​ແວດ​ລ້ອມ​​ທີ່ເອື້ອ​ອໍານວຍ​ ໂດຍຍຶດໝັ້ນ​ແນວທາງການຕ່າງປະເທດ “ສັນຕິພາບ, ​ເອກະລາດ, ມິດຕະພາບ ​ແລະ ການ​ຮ່ວມ​ມື ຢ່າງສະເໝີຕົ້ນສະ  ເໝີປາຍ ແລະ ປະຕິບັດນະໂຍບາຍເປີດກວ້າງການພົວພັນຮ່ວມມືແບບຫຼາຍທິດ,​ ຫຼາຍຝ່າຍ ແລະ ຫຼາຍຮູບແບບ ຕາມທິດນຳ “ເພີ່ມມິດຫຼຸດຜ່ອນສັດຕູ”.

---