ຄະນະຜູ້ແທນພັກ ປປ ລາວ ເຂົ້າຮ່ວມກອງປະຊຸມສາກົນ ກ່ຽວກັບ ຄວາມໝັ້ນຄົງໃນພາກພື້ນເອີຣົບ-ອາຊີ.

ເຜີຍ​ແຜ່​ໂດຍ​: moderator ເວ​ລາ: 04/06/2025 09:47:43 ຈຳ​ນວນ​​ຢ້ຽມ​ຊົມ 85 ຄັ້ງ ​

     ໂດຍໄດ້ຮັບການມອບໝາຍຈາກຄະນະພັກຂັ້ນເທິງ ແລະ ຕອບສະໜອງການເຊື້ອເຊີນຂອງພັກຣັດເຊຍເອກະພາບ, ຄະນະຜູ້ແທນພັກ ປປ ລາວ ນໍາໂດຍ ສະຫາຍ ທອງດົມ ອິນທະພົນ, ຮອງຫົວໜ້າກົມຄົ້ນຄວ້າ ແລະ ພົວພັນຫຼາຍຝ່າຍ, ຄະນະພົວພັນຕ່າງປະເທດສູນກາງພັກ ໄດ້ເດີນທາງໄປເຂົ້າຮ່ວມກອງປະຊຸມສາກົນ ກ່ຽວກັບ ຄວາມໝັ້ນຄົງໃນພາກພື້ນເອີຣົບ-ອາຊີ ທີ່ເມືອງເປີມ, ສະຫະພັນຣັດເຊຍ ໃນລະຫວ່າງວັນທີ 28-30 ພຶດສະພາ 2025 ໂດຍ​ການ​ເປັນ​ເຈົ້າ​ພາບຂອງ​ພັກຣັດເຊຍເອກະພາບ, ເຊິ່ງມີຜູ້ແທນຈາກບັນດາພັກການເມືອງຈາກພາກພື້ນເອີຣົບ ແລະ ອາຊີ, ບັນດາຜູ້ຕາງໜ້າຈາກອົງການຈັດຕັ້ງສາກົນ ແລະ ຜູ້ຊ່ຽວຊານ  ຫຼາຍກວ່າ 120 ທ່ານ ເຂົ້າຮ່ວມ.

     ກອງປະຊຸມສາກົນ ກ່ຽວກັບ ຄວາມໝັ້ນຄົງໃນພາກພື້ນເອີຣົບ-ອາຊີ ແມ່ນຂອບກອງປະຊຸມໜຶ່ງເພື່ອສະໜັບສະໜຸນຂໍ້ລິເລີ່ມຂອງທ່ານປະທານາທິບໍດີ ແຫ່ງ ສະຫະພັນຣັດເຊຍ ໃນການສ້າງໂຄງສ້າງຄວາມໝັ້ນຄົງທີ່ເທົ່າທຽມ ແລະ ບໍ່ສາ ມາດຕັດແຍກອອກຈາກກັນໄດ້ ໂດຍໄດ້ເຕົ້າໂຮມບັນດາພັກການເມືອງໃນພາກພື້ນເອີຣົບ-ອາຊີ ເພື່ອລົງເລິກແລກປ່ຽນ  ແລະ ປຶກສາຫາລື ກ່ຽວກັບ ຄວາມໝັ້ນຄົງໃນດ້ານຕ່າງໆ ແລະ ບັນຫາເພື່ອສັນຕິພາບໃນໂລກ, ເສີມຂະຫຍາຍສາຍພົວພັນຢ່າງ ຮອບດ້ານ,  ການຮ່ວມມືແບບຕ່າງຝ່າຍຕ່າງມີຜົນປະໂຫຍດ, ເທົ່າທຽມກັນ ແລະ ການພັດທະນາຂອງພາກພື້ນເອີຣົບ-ອາຊີ.

     ກອງປະຊຸມໄດ້ດໍາເນີນໄປພາຍໃຕ້ບັນຍາກາດທີ່ຟົດຟື້ນ ໂດຍມີການປຶກສາຫາລື ແລະ ແລກປ່ຽນຄວາມຄິດເຫັນນໍາກັນຢ່າງກວ້າງຂວາງ ເຊິ່ງບັນດາຜູ້ແທນທີ່ເຂົ້າຮ່ວມໄດ້ຕີລາຄາສູງ ແລະ ຊົມເຊີຍຕໍ່ການເປັນເຈົ້າພາບຂອງພັກຣັດເຊຍເອກະພາບ; ຍົກໃຫ້ເຫັນບົດບາດຄວາມສໍາຄັນໃນການນໍາພາ ຂອງພັກການເມືອງ ກໍຄື ການສ້າງກົນໄກໃໝ່ ໃນການເສີມສ້າງສັນຕິພາບ ແລະ ຄວາມໝັ້ນຄົງໃນພາກພື້ນເອີຣົບ-ອາຊີ, ການຮ່ວມມືເຊິ່ງກັນແລະກັນ ລະຫວ່າງ ພັກການເມືອງໃນດ້ານຕ່າງໆ ອັນເປັນປັດໄຈສໍາຄັນ ໃນການຂັບເຄື່ອນການພັດທະນາຂອງໂລກ ເພື່ອເສີມສ້າງສັນຕິພາບ ແລະ ຄວາມໝັ້ນຄົງທີ່ຍືນຍົງ; ພ້ອມກັນນັ້ນ, ກໍ່ໄດ້ຮຽກຮ້ອງໃຫ້ບັນດາພັກການເມືອງໃນພາກພື້ນເອີຣົບ-ອາຊີ ກໍຄື ບັນດາກຳລັງການເມືອງທີ່ຮັກຫອມສັນຕິພາບ ຍົກສູງບົດບາດຄວາມຮັບຜິດຊອບ ແລະ ຄວາມເປັນເຈົ້າການ, ເພີ່ມທະວີການປະກອບສ່ວນ ແລະ ການຮ່ວມມືໃນແຕ່ລະດ້ານ, ສະໜັບສະໜູນເຊິ່ງກັນ ແລະ ກັນ ບົນຫຼັກການຢູ່ຮ່ວມກັນໂດຍສັນຕິ ແລະ ຕ່າງຝ່າຍຕ່າງໄດ້ຮັບຜົນປະໂຫຍດ. ກົນໄກກອງປະຊຸມເວທີປຶກສາຫາລືດັ່ງກ່າວ ຍັງເປັນໂອກາດສໍາຄັນໃນການເຕົ້າໂຮມກໍາລັງແຮງຂອງບັນດາພັກການເມືອງໃນພາກພື້ນເອີຣົບ-ອາຊີ, ເສີມສ້າງຄວາມເຂົ້າອົກເຂົ້າໃຈ ແລະ ເພີ່ມທະວີການຮ່ວມມື ເພື່ອປະ ກອບສ່ວນເຂົ້າໃນການສົ່ງເສີມການພັດທະນາ ແລະ ຄວາມໝັ້ນຄົງຂອງໂລກໃນຕໍ່ໜ້າ.

     ໃນໂອກາດດັ່ງກ່າວ, ຄະນະຜູ້ແທນພັກ ປປ ລາວ ຍັງໄດ້ມີການພົບປະແລກປ່ຽນກັບບັນດາຄະນະຜູ້ແທນຈາກພັກເພື່ອນມິດຍຸດທະສາດອ້າຍນ້ອງ ເພື່ອຮັກສາຄວາມເປັນເອກະພາບ ແລະ ສະໜັບສະໜູນເຊິ່ງກັນແລະກັນ ໃນເວທີຫຼາຍຝ່າຍ ກໍຄື ຍົກສູງບົດບາດຂອງພັກ ປປ ລາວ ໃນເວທີພາກພື້ນ ແລະ ສາກົນ, ປະກອບສ່ວນເຂົ້າໃນການເສີມສ້າງສັນຕິພາບ, ຄວາມໝັ້ນຄົງ ແລະ ການພັດທະນາຂອງໂລກ.

---